Qurollangan shaxs 5-iyun kuni AQSHning Livandagi elchixonasiga hujum uyushtirgan. Bu haqda Livan mahalliy nashrlariga tayanib, Reuters nashri xabar bergan.
Livan armiyasi rasmiylari ham hujum sodir bo‘lganini tasdiqlagan. Qurolli fuqaro Bayrutdagi AQSH elchixonasiga ogohlantirishsiz o‘q uzgani aytilgan.
Voqea sodir bo‘lgan hududga tezkor ravishda politsiya va xavfsizlik kuchlari yuborilgan. Hujum ishtirokchisi otishma oqibatida yaralanib, shifoxonaga olib ketilgan.
Rasmiylar hujumchi Suriya fuqarosi bo‘lganini maʼlum qilgan. Ayni damda xavfsizlik xizmatlari shahar bo‘ylab boshqa qurolli shaxslarni ham izlayotgani maʼlum qilingan.
AQSH elchixonasi hozirda ish faoliyatini butunlay to‘xtatgan. U yaqin fursatda qayta ochilishi eʼlon qilingan.
Hujum oqibatida yaralangan va halok bo‘lganlar haqida xabar berilmagan. AQSHning Livandagi elchisi Liza Jonson ham hujum ro‘y bergan paytda mamlakat hududida bo‘lmagan.
Qornidan yaralangan suriyalik fuqaro tuzalgandan so‘ng tergov davom etishi aytilgan. Hozirda uning ahvoli mo‘tadil ekani bildirilgan.
Bayrutdagi AQSH elchixonasi yaqiniga hujum sodir etgan shaxsning surati joylashtirilgan. Uni taniga fuqarolardan maʼlumot berish so‘ralgan.
Bir qancha mahalliy nashrlar hujum tashkilotchisi sifatida “Hizbulloh”ga ishora qilgan. Shunga qaramay, na “Hizbulloh” va na boshqa guruh qurolli hujum uchun masʼuliyatni o‘z zimmasiga olgan.
Hozirda Livan xavfsizlik kuchlari AQSH elchixonasi atrofida qo‘shimcha nazorat punktlari o‘rnatmoqda. Elchixona hududini harbiy vertolyot nazorat qilmoqda.
Livan muvaqqat bosh vaziri Najib Mikati mudofaa vaziri va xavfsizlik kuchlari bilan voqeani kuzatib borayotganini aytgan. Qurolli shaxslar uyushmasini to‘liq qo‘lga olishda shaxsan faollik ko‘rsatishini bildirgan.
Maʼlumot o‘rnida, 1983-yilda Livan poytaxti Bayrut shimolida joylashgan AQSH elchixonasi hududida terakt sodir etilgan. Xudkush terrorchi elchixona binosiga kirib olib, o‘zini portlatgan. Hodisada 60 dan ortiq kishi halok bo‘lgan. Ushbu voqeadan so‘ng elchixona nisbatan xavfsizroq hududga, Bayrut janubiga ko‘chirilgan.
Izoh (0)