“Daryo” nashri 12-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Shavkat Mirziyoyev Qozog‘istonga jo‘nab ketdi
Shavkat Mirziyoyev Qozog‘iston prezidenti Qosim-Jo‘mart To‘qayevning taklifiga binoan 12-oktabr kuni Ostona shahriga jo‘nab ketdi. Bu haqda prezident matbuot xizmati xabar berdi.
Prezident u yerda Osiyoda hamkorlik va ishonch choralari bo‘yicha kengash hamda Mustaqil Davlatlar Hamdo‘stligi davlat rahbarlari kengashining navbatdagi majlislarida ishtirok etadi.
Xususan, O‘zbekiston, Turkiya, Ozarbayjon, Rossiya, Iroq, Eron, Qatar, Falastin kabi mamlakatlar prezidentlari sammitda qatnashadi. Markaziy Osiyo mintaqasidan esa faqatgina Afg‘oniston ishtirok etmayapti.
“Har kuni bomba ovozi eshitiladi”. Rossiyadagi o‘zbekistonlik talabalar elchixona yordamidan umidvor
“Daryo” internet-nashriga Rossiyaning Belgorod viloyati hududida joylashgan Belgorod davlat texnika universitetining o‘zbekistonlik talabalaridan murojaat kelib tushdi. Ular shahardagi ijtimoiy ahvol, urush fonida o‘zgargan yashash tarzi hamda har kuni eshitilib turadigan bomba ovozlari haqida so‘zlab berdi.
Murojaatchilar bir qancha videolarni ilova qilgan. Ularda bomba portlashi hamda snaryad ovozlarini eshitish mumkin.
Eslatib o'tamiz, 11-oktabr kuni Rossiyaning Kursk viloyatida o‘qiyotgan o‘zbekistonlik talabalar Ukrainaga chegaradosh hududlarda xavf tobora ortib borayotgani sabab prezident Shavkat Mirziyoyevga murojaat bilan chiqdi. Ular shahardagi ahvol notinch ekanini aytib, davlat rahbaridan ularning o‘qishini O‘zbekistonga ko‘chirib berishni so‘ragan.
“Ukrainadagi urushda keskin burilish paytiga yetib keldik” — Bayden ma’muriyati vakili“Biz urushda potensial keskin burilish nuqtasida turganimizni, albatta, tushunamiz, — dedi Bayden ma’muriyatining yuqori mansabli vakili The Washington Post nashriga. Nashr suhbatdoshining so‘zlariga ko‘ra, bu xavfli vaziyatdir. “Urushda keskin burilish paytlari odatda xavfli bo‘ladi. Devor ortidan nima chiqishini oldindan bilib bo‘lmaydi”, — dedi u.
Ukraina bilan ziddiyatdagi keskin burilish nuqtasi haqida Rossiya rasmiy shaxslari ham aytmoqda. “Bugungi kundan Rossiya maxsus harbiy operatsiyaning yangi bosqichiga kirishdi, — dedi Federatsiya kengashining mudofaa va xavfsizlik qo‘mitasi rahbari Viktor Bondaryov 10-oktabr kuni. — Endi yanada qat’iyroq harakat qilamiz”.
Rossiya FXX Qrim ko‘prigidagi portlash ishi bo‘yicha gumonlanuvchilarni qo‘lga oldi
Rossiya Federal xavfsizlik xizmati Qrim ko‘prigidagi portlash yuzasidan qo‘zg‘atilgan jinoiy ish doirasida besh nafar rossiyalik, uch nafar ukrainalik va armanistonlik fuqarolar qo‘lga olinganini ma’lum qildi. Ular jinoyatni tayyorlashda ishtirok etganlikda gumonlanmoqda, deb yozadi Meduza. “FXX va Rossiya Tergov qo‘mitasi Qrim ko‘prigidagi terakt tashkilotchisi Ukraina Mudofaa vazirligining Bosh razvedka boshqarmasi, uning boshlig‘i Kirill Budanov, xodimlari va agentlari bo‘lganini aniqladi”, — deyiladi Rossiya razvedka xizmati xabarida.Idoraning qo‘shimcha qilishicha, tergovchilar hodisaga aloqadorlikda gumonlangan 12 kishini aniqlagan.
Qrim ko‘prigidagi portlashdan so‘ng, Qrim rahbari Sergey Aksyonov Kerchda, shuningdek, hududning Leninskiy tumanida terrorchilik xavfining “sariq” darajasini joriy qilgan. Bu haqda u Telegram kanalida yozdi.
Rossiyaning raketa zarbalari Ukraina energetika obyektlarining uchdan bir qismiga zarar yetkazdi
Ukrainada 10-oktabr kuni boshlangan Rossiyaning keng ko‘lamli raketa hujumi oqibatida energetika infratuzilmasining 30 foizga yaqini zarar ko‘rdi. Bu haqda CNN telekanaliga Ukraina energetika vaziri German Galushenko ma’lum qildi. Uning so‘zlariga ko‘ra, Rossiya bosqini boshlangan fevral oyidan beri birinchi marta rus qo‘shinlari Ukraina energetika obyektlariga maqsadli zarbalar bergan.
Galushenkoning fikricha, infratuzilmaga qilingan hujum sabablaridan biri Ukrainaning Yevropaga elektr energiyasi eksporti bo‘lgan — u “Yevropa davlatlariga Rossiya gazi va ko‘mirini tejashga yordam berayotgan edi”. Vazir Ukraina energetika tizimi haliyam barqaror ekanini ta’kidladi, biroq hamkorlarni Ukrainani infratuzilma obyektlarini himoya qila oladigan havo hujumidan mudofaa tizimlari bilan ta’minlashga chaqirdi.
Izoh (0)