O‘zbekistonning Belgiyadagi elchisi G‘ayrat Fozilov Niderlandiyada (qarorgohi Bryussel shahrida joylashgan) ham elchi etib tayinlandi. Bu haqda “Dunyo” AA xabar berdi.
G‘ayrat Fozilov ushbu davlat Tashqi ishlar vazirligining Protokol va qabul qiluvchi mamlakat bilan aloqalar departamenti direktori Xansu Akerbumga ishonch yorliqlari nusxasini topshirdi.
Tomonlar siyosiy-diplomatik, parlamentlararo, savdo-iqtisodiy va investitsiyaviy sohalardagi O‘zbekiston va Niderlandiya o‘rtasidagi o‘zaro munosabatlarning rivojlanib borayotgan dinamikasini mamnuniyat bilan qayd etdi.
2024-yilning aprel oyida Toshkent shahrida ikki davlat tashqi siyosat idoralari o‘rtasida o‘tkazilgan siyosiy maslahatlashuvlarning navbatdagi davrasi yakunlari ijobiy baholandi va bu mexanizmni muntazam yo‘lga qo‘yish zarurligi taʼkidlandi.
Suhbat chog‘ida ikki va ko‘p tomonlama formatdagi kelgusi rejalar, turli darajadagi bo‘lajak uchrashuv va tadbirlar jadvali yuzasidan ham fikr almashildi.
Xans Akerbum Protokol bo‘limi elchixona faoliyatini, jumladan, O‘zbekiston-Niderlandiya muloqotini mustahkamlashda har tomonlama yordam berishini tasdiqladi.
G‘ayrat Fozilov 2015–2017 va 2021–2023-yillarda O‘zbekiston tashqi ishlar vazirining o‘rinbosari lavozimida ishlagan. TIV qoshidagi Jahon iqtisodiyoti va diplomatiya universitetini tamomlagan.
1996-yildan buyon TIV tizimida faoliyat yuritib kelmoqda. Diplomatik xizmatini Yevropa davlatlari bilan hamkorlik bo‘yicha boshqarma attashesi sifatida boshlagan. TIV markaziy apparatida, Prezident huzuridagi Milliy xavfsizlik kengashida, shuningdek, O‘zbekistonning Fransiya va Belgiyadagi elchixonalarida, NATO huzuridagi missiyada turli lavozimlarda ishlagan. 2018—2021-yillarda Yaponiyadagi elchi vazifasida faoliyat yuritgan.
U 2023-ning 5-dekabr kuni Belgiya poytaxtiga yetib borgandi.
Diplomat fransuz va ingliz tilini biladi.
Izoh (0)