2022-yil kuzda Rossiyaning Kobuldagi elchixonasi yonida o‘zini portlatgan o‘zbekistonlik Xusanjon Osimiy o‘limidan so‘ng Rossiyada sudlanadi. Bu haqda “Kommersant” xabar berdi.
“Tolibon” voqea joyini ko‘zdan kechirish va guvohlarni so‘roq qilish bo‘yicha protokollarni Rossiya Tergov qo‘mitasiga yuborgan. O‘zbekiston rasmiylari ham marhum haqida ma’lumotlarni bergan.
Tergov versiyasiga ko‘ra, u taqiqlangan ISHID terrorchilik tashkilotiga qo‘shilib, xudkush-terrorchi sifatida harakat qilgan. Marhumning qarindoshlari ayblovga rozi bo‘lmagani bois u Rossiyada sirtdan va o‘limidan keyin sud qilinadi.
2022-yilning 5-sentabr kuni ISHID terrorchilik guruhidan bo‘lgan xudkush-terrorchi Rossiyaning Kobuldagi elchixonasining konsullik bo‘limiga kirish joyi yaqinida o‘zini portlatib yuborgan.
U konsullik xodimi navbatda turgan odamlar oldiga chiqqan paytda portlovchi qurilmani ishga tushirgan.
Oqibatda Rossiya elchixonasining ikki xodimi: ikkinchi kotib Mixail Shax va xavfsizlik xodimi Adigji Kujuget halok bo‘lgan.
Ulardan tashqari elchixonaning tashqarisini qo‘riqlab turgan “Tolibon” harakatining to‘rt nafar jangchisi ham o‘lgan.
Jinoiy ish bilan Rossiya Tergov qo‘mitasining bosh tergov boshqarmasi shug‘ullangan.
Tergov qo‘mitasi va Bosh prokuraturaning xalqaro huquqiy hamkorlik bo‘limlari ham tergovga jalb qilingan. Ushbu ikki tuzilma orqali barcha yozishmalar olib borilgan, natijada sud jarayonining o‘n oyi davomida munosib miqdordagi dalillar shakllantirilgan.
Izoh (0)