O‘zbekiston fuqarolari noma’lum sabablarga ko‘ra BAA hududiga kiritilmayapti. Mamlakatning BAAdagi elchixonasi holat yuzasidan ma’lumot berdi.
30-noyabr kuni Abu Dabi shahridagi Shayx Zoid nomidagi xalqaro aeroportga Toshkent—Abu-Dabi yo‘nalishi bo‘yicha Wizz Air aviaqatnovi orqali uchib kelgan 31 nafar O‘zbekiston fuqarosi noma’lum sabablarga ko‘ra amirliklar hududiga kiritilmagan.
O‘zbekistonning Abu Dabidagi elchixonasi va Dubaydagi Bosh konsulxonasi mazkur aeroport ma’muriyati va amirliklarning mutasaddi idoralari vakillari bilan muloqotda bo‘lib, vaziyatni nazoratga olgan.
“Aeroport ma’muriyati bilan hamkorlikda hamyurtlarimizni uch mahal ovqat bilan ta’minlash hamda ularga zarur hollarda tibbiy yordam ko‘rsatish choralari tashkil etildi. Yuzaga kelgan vaziyatni hal etish bo‘yicha barcha chora-tadbirlar ko‘rilmoqda”, deyiladi elchixona xabarida.
Yo‘lovchilardan birining “Gazeta.uz”ga ma’lum qilishicha, 31 kishi orasidagi ayollar, bolalar va keksa yoshdagilar qo‘yib yuborilgan. 20 dan 40 yoshgacha bo‘lgan erkaklar ushlab qolingan, ular mamlakatdan chiqarib yuborilishi mumkin. Yo‘lovchilarning hech biriga bunday harakatlar sababi aytilmagan.
“Uchib kelganimizdan so‘ng pasport nazoratida bizni shunchaki olib ketishdi, hech qanday sababsiz pasportlarni olib qo‘yishdi”, degan u.
BAAga tashrif buyurgan o‘zbekistonliklarning tashrif maqsadi turlicha bo‘lgan: kimdir sayohat uchun kelgan bo‘lsa, kimdir biznes-uchrashuv o‘tkazishga, oilasini ko‘rish uchun kelgan.
Izoh (0)