Taxtaqoracha dovonida Cobalt’ga tosh qulashi oqibatida halok bo‘lganlarning ikki nafari Vengriya fuqarosi bo‘lgan. Bu haqda O‘zbekistonning Vengriyadagi elchixonasi ma’lum qildi.
Holat 6-noyabr kuni Qashqadaryo viloyatining Kitob tumanidan o‘tgan Samarqand va Qashqadaryo viloyatlarini bog‘lovchi M-39 avtomobil yo‘lining 1138-kilometrida sodir bo‘lgandi. Avtomashina ichidagi 3 nafar fuqaro voqea joyida vafot etgan.
“O‘zbekiston Respublikasining Vengriyada elchixonasi Kitob—Samarqand yo‘lida Qashqadaryo viloyatida toshlar qulab tushishi natijasida ikki nafar Vengriya fuqarosining fojiali halok bo‘lganligi haqidagi xabarni chuqur qayg‘u bilan qabul qildi. Vafot etganlarning yaqinlariga va oila a’zolariga samimiy hamdardlik bildiramiz. Ushbu baxtsiz hodisa, afsuski, dunyoning istalgan nuqtasida sodir bo‘lishi mumkin bo‘lgan tabiiy ofat natijasida ro‘y berdi”, deyiladi elchixona xabarida.
Qayd etilishicha, O‘zbekiston tomoni barcha tafsilotlarni aniqlash uchun sinchkovlik bilan tergov o‘tkazmoqda.
Elchixona halok bo‘lganlarning jasadlarini vatanlariga tez orada qaytarishda to‘liq yordam berishga tayyorligini bildirdi.
Izoh (0)