Tojikistonning Rossiyadagi elchixonasi 10-sentyabr kuni respublika fuqarolariga bu mamlakatga safar qilishdan tiyilishni tavsiya qildi.
Rossiyada quruqlik va havo o‘tkazish punktlarida chet el fuqarolarining davlat chegarasi orqali kirishini qattiq nazorat qilish rejimi davom etayotgani sababli Tojikistonning Rossiyadagi elchixonasi respublika fuqarolariga ushbu mamlakatga vaqtincha bormasliklarini tavsiya qiladi.
Elchixona xuddi shu ta’rif bilan respublika fuqarolariga Belarusga ham vaqtincha safar qilishdan tiyilishni tavsiya etmoqda. Bu Tojikistonning o‘z fuqarolariga Rossiyaga bormaslikni tavsiya qilgan birinchi holat emas. Xususan, Crocus City Hall’dagi terakt va unga aloqadorlikda gumon qilingan tojikistonliklarning hibsga olinishi, shuningdek, keng ko‘lamli reydlar va tekshiruvlardan so‘ng, mamlakat Tashqi ishlar vazirligi, zarurat bo‘lmagan taqdirda, Rossiyaga sayohat qilmaslikni so‘ragandi.
Tekshiruvlar natijasiga ko‘ra, so‘nggi bir necha oy ichida Rossiya minglab tojiklarning mamlakatga kirishini rad etgan yoki deportatsiya qilgan. So‘nggi olti oyda 17 mingdan ortiq Tojikiston fuqarolari Rossiyadan chiqarib yuborilgan.
5-sentyabr kuni Qirg‘iziston Tashqi ishlar vazirligi o‘z fuqarolaridan Rossiyaga bormaslikni so‘ragandi.
Aksariyat muhojirlarning aytishicha, Crocus’ga qilingan hujumdan so‘ng bosim shu darajaga yetganki, Rossiyada yashash va ishlash “chidab bo‘lmas” bo‘lib qolgan.
Izoh (0)