“Daryo” nashri 11-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Qozog‘iston va O‘zbekiston elchixonasi Ukrainadagi vatandoshlarini mamlakatni tark etishga chaqirdi
Qozog‘istonning Ukrainadagi elchixonasi Ukraina hududida bo‘lib turgan qozog‘istonliklarga murojaat qilib, ulardan iloji bo‘lsa mamlakatni tark etishni so‘radi.
11-oktabr kuni O‘zbekistonning Ukrainadagi elchixonasi ham mamlakat shaharlariga raketa hujumlarining kuchayishi ortidan O‘zbekiston fuqarolarini ushbu davlatni tark etishga chaqirdi. Elchixona, shuningdek, ziddiyat o‘z iziga tushguniga qadar Ukrainaga sayohat qilmaslikni so‘ragan.
Eslatib o‘tamiz, 10-oktabr kuni ertalab Rossiya qo‘shinlari Ukraina shaharlarini raketalardan o‘qqa tuta boshladi. Otishmada tinch aholi orasida qurbonlar bo‘ldi, fuqarolik infratuzilmasi obyektlari jiddiy zarar ko‘rdi, elektr energiyasi uzildi.
Jahondagi ayni vaziyat yuzasidan, Polsha Tashqi ishlar vazirligi o‘z fuqarolariga Belarusga bormaslikni, u yerdagi polshaliklarga esa respublikani tark etishni tavsiya qildi. Tegishli bayonot vazirlikning rasmiy saytida paydo bo‘ldi. “Mintaqada keskinlikning kuchayishi, harbiy hodisalar va Polsha fuqarolarining hibsga olinishi bilan bog‘liq takroriy holatlar munosabati bilan TIV Polsha fuqarolariga Belarus respublikasiga bormaslikni tavsiya qiladi”, — deyiladi xabarda.
Vazirlik ta’kidlashicha, “xavfsizlik holati keskin yomonlashganda, chegaralar yopilganda yoki boshqa kutilmagan vaziyatlarda evakuatsiya qilish sezilarli darajada qiyin, hatto imkonsiz bo‘lib qolishi mumkin”.
Ukrainaning butun hududi bo‘ylab havo trevogasi e’lon qilindi
11-oktabr kuni ertalab Ukrainaning Vinnitsa viloyatidagi Ladijin issiqlik elektr stansiyasiga ikkita Shahed-136 kamikadze-dronlari hujum qildi, bu haqda viloyat ma’muriyati rahbari Sergey Borzov ma’lum qildi. “Janub” havo qo‘mondonligi xabariga ko‘ra, 11-oktabrga o‘tar kechasi Nikolayev viloyatida beshta, Odessa viloyatida esa uchta Shahed-136 dronlari havo hujumiga qarshi mudofaa tizimi tomonidan yo‘q qilingan.
11-oktabr kuni ertalab Ukrainaning aksariyat viloyatlarida yana havo trevogasi e’lon qilindi. Keyinroq esa butun Ukraina hududi bo‘ylab havo trevogasi haqida xabar berildi.
Ayni vaziyat yuzasidan, Britaniya bosh vaziri Liz Trass Rossiyaning Ukrainaga raketa hujumlari tufayli NATO yetakchilarini shoshilinch yig‘ilishga chaqirmoqchi. Britaniya hukumati rahbari bugun, 11-oktabr kuni onlayn formatda bo‘lib o‘tadigan G7 sammitida tegishli murojaat bilan chiqadi.
Putin harbiy to‘ntarishdan xavfsiramoqda: Milliy gvardiya Moskvada to‘liq jangovar shaylikka keltirildi
Rossiya prezidenti Vladimir Putin davlat to‘ntarishidan xavfsirab, Moskvaga Tezkor topshiriqli alohida bo‘lim (ODON)ni joylashtirdi, deb xabar bermoqda The Mirror Ukraina razvedkasidagi manbalariga tayanib.
Ta’kidlanishicha, ODON bo‘linmalari Rossiya poytaxtini qo‘riqlashni kuchaytirgan va bo‘linmaning barcha harbiylari to‘liq jangovar shaylikka keltirilgan. Putinning 18 ming kishilik qo‘riqlov xizmati gumon ostiga tushgan harbiy xizmatchilarni hibsga olib, Moskvaga kirishda esa blokpostlar o‘rnatishni boshlagan. Ushbu bo‘linmaga general-mayor Nikolay Kuznetsov rahbarlik qiladi. Voqealar Putin Ukraina maxsus xizmatlarini Qrim ko‘prigidagi “terakt”da ayblaganidan keyin sodir bo‘lgan.
Ushbu holat yuzasidan Buyuk Britaniya Hukumat aloqa markazi rahbari Jeremi Fleming o'z ma’ruzasida quyidagicha so'z yuritadi. Ukraina “holdan toygan” Rossiya kuchlariga qarshi urushda vaziyatni o‘zgartirmoqda. Rossiya armiyasi zaif holatda, uning avvalgi yutuqlari esa mag‘lubiyatlarga aylanmoqda. BBC ma’ruzadan olingan parchalarni e’lon qilgan.
“Ukrainaning jang maydonidagi va kibermakondagi dadil harakatlari vaziyatni o‘zgartirmoqda”, — dedi Fleming. Uning so‘zlariga ko‘ra, hokimiyat hech narsa bilan cheklanmagani tufayli Rossiya prezidenti Vladimir Putinning qarorlari xato bo‘lib chiqqan.
Avvalroq Rossiya tashqi ishlar vaziri Sergey Lavrov mart oyida Istanbulda bo‘lib o‘tgan Rossiya—Ukraina muzokaralarida tomonlar vaziyatni “hal qilish yondashuvi” bo‘yicha kelishib olishga tayyor bo‘lganini aytgan edi. Vazirning ta’kidlashicha, o‘shanda Kiyevning shartlari bo‘yicha sulhga erishish mumkin bo'lgan. Ammo muzokaralar “AQSH va Londonning bevosita buyrug‘i bilan” to‘xtatilgan.
OTMlarning 1-kurs talabalariga 2 oylik ijara kompensatsiyasi hech qanday shartnomasiz to‘lab beriladi
O‘zbekistonda ijarada turadigan 1-kurs talabalariga 2 oylik ijara kompensatsiyasi hech qanday shartnomasiz to‘lab beriladi. Noyabrdan boshlab, ijara shartnoma bo‘lsa, keyin kompensatsiya beriladi. Bu haqda huquqshunos Xushnudbek Xudoyberdiyev yozmoqda.
Qayd etilishicha, Vazirlar Mahkamasining bayoniga binoan, talabalar safiga qabul qilingan va talabalar turar joyi bilan qamrab olinmagan uzoq hududlardan kelgan birinchi kurs talabalariga, istisno tariqasida, oliy ta’lim muassasalariga ajratilgan mablag‘lar doirasida sentabr va oktabr oylari uchun ijara shartnomasi talab etmasdan ijara kompensatsiyasi to‘lab beriladi. Ijara shartnomasini taqdim etgan talabalarga noyabr oyidan to‘lovlar davom ettiriladi.
Izoh (0)