Moskva viloyatida general Igor Kirillov va uning yordamchisi Ilya Polikarpovni o‘ldirganlikda gumonlanib, O‘zbekiston fuqarosi qo‘lga olindi. Bu haqda Rossiya Federal xavfsizlik xizmatiga tayanib, “RIA Novosti” xabar berdi
Rossiya FXXga ko‘ra, 17-dekabr kuni general va yordamchisining o‘limiga sabab bo‘lgan teraktni amalga oshirgan shaxs bombani elektr samokatga o‘rnatgan. O‘zbekiston fuqarosi kuzatuv uchun karshering mashinasini ijaraga olib, unga Wi-Fi kamerasini ulagan. Tasvirlar esa Dnepropetrovskdagi terakt tashkilotchilariga uzatilgani ma’lum qilingan.
Ta’kidlanishicha, general va yordamchisi podyezddan chiqishi haqida videosignal olingandan so‘ng, Ukraina razvedkasi masofadan turib bombani ishga tushirishga ko‘rsatma bergan.
“Qotillik sodir etgan O‘zbekiston fuqarosiga Ukraina maxsus xizmatlari tomonidan 100 ming AQSH dollari miqdorida mukofot puli va Yevropa ittifoqiga chiqish va’da qilingan”, deyiladi Rossiya FXX bayonotida.
Qotillikda gumonlangan o‘zbekistonlik erkak Moskva viloyati Balashixa tumanidagi Chernoye qishlog‘ida qo‘lga olingan.
Marhum urushda kimyoviy qurollardan foydalanishni buyurgan
Ukraina Xavfsizlik xizmati ta’kidlashicha, Igor Kirillovning buyrug‘i bilan 2022-yil fevral oyidan buyon Rossiya tomonidan 4800 dan ortiq kimyoviy qurollardan foydalanish holatlari qayd etilgan. Gap CS va CN kabi qo‘zg‘atuvchi ta’sirga ega zaharli moddalar bilan jihozlangan K-1 jangovar granatalari haqida bormoqda.
Ulardan foydalanish 1993-yildan beri Kimyoviy qurolni ishlab chiqish, ishlab chiqarish, qo‘llash va yo‘q qilishni taqiqlash to‘g‘risidagi konvensiya bilan man etilgan. Urush davomida 2000 dan ortiq harbiy turli darajadagi kimyoviy zaharlanish bilan kasalxonalarga tushgan.
Rossiya asosan FPV-dronlardan mudofaa nuqtalariga zaharli moddalar bilan o‘q-dorilar tashlashda foydalanadi. Bu esa shilliq qavatlarning, birinchi navbatda, ko‘z va nafas yo‘llarining shikastlanishiga olib keladi.
Izoh (0)