AQSHning Kiyevdagi elchixonasi Ukraina poytaxtiga yirik hujum uyushtirilishi mumkinligidan ogohlantirdi.
Xabar qilinishicha, havo hujumi 20-noyabr kuni amalga oshirilishi mumkin.
“Bizda ehtimoliy yirik havo hujumi haqida aniq ma’lumotlar bor”, dedi elchixona X platformasidagi murojaatida.
Amerika fuqarolariga signal chalingan taqdirda darhol xavfsiz joyga berkinish tavsiya etilgan. Shu bilan birga, keng ko‘lamli hujum xavfi tufayli AQSH, Gretsiya, Ispaniya va Italiya elchixonalari o‘z faoliyatini to‘xtatdi.
Bu ogohlantirish Rossiya va Ukraina o‘rtasidagi mojaroning kuchayishi fonida e’lon qilindi.
AQSH prezidenti Jo Bayden Ukrainaga Rossiya hududiga zarba berish uchun uzoq masofali qurollardan foydalanishga ruxsat berganidan keyin Kiyev va Moskva o‘rtasidagi vaziyat yanada keskinlashdi.
Bir kun avval ukrainalik harbiylar Amerikaning ATACMS raketalari yordamida Bryansk viloyatidagi harbiy obyektni o‘qqa tutgani haqida xabar berilgan edi. Rossiya Mudofaa vazirligi mazkur ma’lumotni tasdiqlab, harbiy obyektga oltita uzoq masofali ATACMS raketalari bilan zarba berilganini aytgan. Qayd etilishicha, Amerikaning beshta ATACMS raketasi urib tushirilgan, bittasi shikastlangan. Raketa parchalari harbiy obyektning texnik hududiga qulagan va halokat joyida yong‘in sodir bo‘lgan.
Rossiyaning yadroviy doktrinasidagi o‘zgarishlar
Shuningdek, Rossiya prezidenti Vladimir Putin Rossiyaning yangilangan yadroviy doktrinasini tasdiqladi. Rossiyaning normativ-huquqiy hujjatlari rasmiy portalida Putinning “Rossiyaning yadroviy quroldan himoya qilish sohasidagi davlat siyosati asoslarini tasdiqlash to‘g‘risida”gi farmoni 19-noyabr kuni e’lon qilindi va kuchga kirdi.
Inson huquqlari bo‘yicha “Birinchi bo‘lim” loyihasi huquqshunoslariga ko‘ra, doktrinaning asosiy o‘zgarishlari shundan iboratki, har qanday yadroga ega bo‘lmagan davlatning, lekin yadroviy davlat ishtiroki yoki qo‘llab-quvvatlashi bilan Rossiyaga qarshi tajovuz ularning RFga birgalikdagi hujumi sifatida baholanadi.
Yangilangan doktrinada qayd etilishicha, agar “strategik va taktik samolyotlar, qanotli raketalar, dronlar, gipertovushli va boshqa samolyotlarning mamlakatga uchirilishi haqida ishonchli maʼlumotlar mavjud bo‘lsa”, Moskva yadroviy javob choralarini ko‘rib chiqadi.
Shuningdek, Rossiya ittifoq davlati aʼzosi sifatida Belarusga qarshi tajovuz sodir bo‘lgan taqdirda yadro qurolidan foydalanishi mumkinligi ham kelishib olindi. Bundan tashqari, doktrinaga ko‘ra, agar “RF suvereniteti va oddiy qurollar uchun jiddiy tahdid” mavjud bo‘lsa, Rossiya yadro qurolidan foydalanishi mumkin.
Izoh (0)