Eron Oliy sudi 2023-yil yanvarida Tehrondagi Ozarbayjon elchixonasiga qurolli hujum uyushtirgan Yasin Husaynzodani o‘lim jazosiga hukm qildi, deb xabar bermoqda AzTV Ozarbayjon davlat telekanali.
2023-yil 27-yanvar kuni Ozarbayjonning Erondagi elchixonasiga qurolli hujum uyushtirilgandi. Kalashnikov avtomatini ko‘targan erkak diplomatik missiya xavfsizlik xizmati rahbarini o‘ldirdi. Hujumni qaytarish chog‘ida elchixonaning yana ikki xodimi yaralandi. Keyinroq hujum lahzalari aks etgan video e’lon qilindi.
OAV elchixonada otishma sodir etgan erkak buni oilaviy sabablarga ko‘ra qilgani haqida yozdi. U yarim yildan ortiq vaqtdan beri bedarak ketgan rafiqasini shu diplomatik vakolatxona binosida deb o‘ylagan.
Ozarbayjon prezidenti Ilhom Aliyev tomonidan terakt sifatida baholangan ushbu voqeadan so‘ng Ozarbayjon hukumati Tehrondagi elchixonaning barcha xodimlari va ularning oila a’zolarini evakuatsiya qilishga qaror qildi. Evakuatsiya 29-yanvar kuni amalga oshirildi.
Hozirda faqat Tabrizda Ozarbayjonning Bosh konsulxonasi faoliyat yuritmoqda.
Izoh (0)