Qirg‘iziston Tashqi ishlar vazirligi fuqarolarini Livan va Isroilga bormaslikka chaqirdi. Tegishli ogohlantirish TIV saytida e’lon qilindi.
Vazirlik Isroil va Livan chegarasidagi murakkab va keskin vaziyat tufayli qirg‘izistonliklarni ogohlantirgan. Yahudiy davlati 23-sentyabr kuni Livanda operatsiya boshladi. Ko‘plab qishloqlar va bir qator aholi punktlari kuchli zarbalar ostida qoldi, 500 dan ortiq odam halok bo‘ldi.
“Isroil va Livanda bo‘lib turgan Qirg‘iziston fuqarolari o‘z xavfsizlik choralarini kuchaytirishi, shuningdek, mintaqadagi vaziyat barqarorlashguncha imkon qadar yuqoridagi mamlakatlarni tark etishi kerak”, deyiladi ogohlantirishda.
Favqulodda aloqa uchun Qirg‘izistonning Kuvaytdagi elchixonasi (+96525359951), Turkiyadagi elchixonasi (+905456896800), Tashqi ishlar vazirligining Konsullik departamentiga (+996 999312002) bog‘lanish so‘ralgan.
O‘zbekiston ham Isroildagi fuqarolarni ogohlantirmoqda
“Hozirgi paytda mamlakatning shimoliy hududlarida murakkab vaziyat vujudga kelayotganini e’tiborga olib, o‘zingizning shaxsiy xavfsizlik choralarini ko‘rishingizni va raketa otishmalari paytida boshpanalarni tark etmaslikni tavsiya etamiz”, deyiladi elchixona murojaatida.
Fuqarolar Isroil hukumati va O‘zbekiston elchixonasi rasmiy xabarlarini kuzatib borishga chaqirildi. Shuningdek, Isroil frontorti qo‘mondonligidan bildirishnomalar va ogohlantirishlar (Home Front Command) mobil ilovasi yoki veb-sayti havolasini telefonga o‘rnatib olish so‘raldi.
“Zaruriyatsiz ko‘chaga va boshqa ko‘ngilochar muassasalarga tashrif buyurmang. Iltimos, o‘z hayotingizni ehtiyot qiling”, deyiladi murojaatda.
Elchixona konsullik bo‘limi ishonch telefonlari:
- 03-672-2466
- 03-672-2371
- 03-758-5075
- 03-758-5076
Favqulodda holatlarda va shoshilinch xabarlar uchun:
- +972 54 485 1397
Izoh (0)