Jinoyat ishlari bo‘yicha Mirzo Ulug‘bek tuman sudida 2024-yilning iyul oyida Toshkent shahrining Yashnobod tumanida sodir etilgan mudhish qotillik — 3 yoshli bolani vahshiylarcha o‘ldirgan 31 yoshli fuqaro ishi ko‘rilayotgani xabar berilgandi. Sudning 25-noyabr kuni davom etgan navbatdagi majlisida Respublika ruhiy kasalliklar shifoxonasidan kelgan psixolog-ekspertlar xulosasi eshitildi.
Tekshiriluvchi M.S.ning bilish jarayonlarida yaqqol ifodalangan buzilish jarayonlari aniqlanmadi. Fikrlari ketma-ketlikda. Individual psixologik xususiyatlarga ko‘ra, o‘z-o‘zini oqlash tendensiyasining yuqoriligi, egosentrizm kabi xususiyatlar aniqlandi. Tekshiriluvchi ijtimoiy xavfli qilmish sodir etgan vaqtda fiziologik affekt holatida bo‘lmagan, deydi Respublika ruhiy kasalliklar shifoxonasining psixolog-eksperti Muqaddas Rustamova.
Ekspertning maʼlumot berishicha, gumonlanuvchi tergov paytida ular bilan suhbatda voqea haqida o‘zi gapirib bergan.
2024-yilning 8-iyul kuni taxminan psixotrop modda — “Regopen” dori vositasini isteʼmol qilgan edim. 9-iyul kuni soat 1:00 larda sharʼiy nikohdagi turmush o‘rtog‘im Nazokat bilan o‘zaro kelishmovchilik oqibatida bir-birimizni kamsitib, temir dastlab o‘tkir tig‘li pichoq bilan Sultonov Solihni tinchlantirish maqsadida badan qismlariga bir necha marotaba shikast yetkazdim. Keyin nima bo‘lganini eslay olmayman. Shu kuni o‘zimni juda yomon his qilgan edim degan ko‘rsatmalarni berib o‘tgan. Qolganini esa eslay olmasligini aytgan. Bu so‘zlar uning o‘zining so‘zlaridan yozib olingan, biz qo‘shimcha kiritmaymiz, dedi ekspert.
Ekspertga ko‘ra, suhbat davomida qotillikda gumonlanayotgan shaxsda o‘z-o‘zini oqlash tendensiyasi kuzatilgan.
Biz testlar, so‘rovnomalar o‘tkazganimizda L, F, K shkalalar ko‘rsatkichi borda, L va K shkalalarining yuqori chiqishi insonning o‘zini yaxshi tarafdan ko‘proq ko‘rsatishga eʼtibor berganligini ko‘rsatadi. Shu sabab men o‘z-o‘zini oqlash tendensiyasi yuqori degan xulosani berganman, deydi u.
Ekspertning qo‘shimcha qilishicha, qotillikda gumonlanayotgan shaxsning qonida psixotrop moddalar, spirtli ichimliklar aniqlanishi to‘g‘ridan to‘g‘ri fiziologik affekt holatini rad etadi.
Bular ruhan sog‘lom. Shunday bo‘lsa-da, o‘zini kasallik holatiga solish bor. Qolaversa, o‘zining gapi bilan xarakteri teskari chiqqan. Shuningdek, bularda o‘zini oqlash holati bo‘lgan. Qachon odam o‘zini oqlaydi, ruhiy sog‘lom bo‘lganda. Ruhiy nosog‘lom odam esa xatti-harakatini to‘g‘ri baholay olmaydi, deydi Muqaddas Rustamova.
Sudda guvohlik qilgan yana bir ekspert Muhiddin Nig‘monovning aytishicha, qotillikda gumonlanayotgan shaxs sud psixatriya-ekspertiza bo‘limida tekshiruvdan o‘tib, 2024-yilning 28-avgustidan 10-sentyabrga qadar nazoratda olingan.
Jinoyat to‘g‘risida u shunday maʼlumot bergan: Turmush o‘rtog‘im Nazokat bilan janjallashib qolgandim, oramizda ko‘p marotaba kelishmovchilik bo‘lar edi. Men oxirgi vaqtda psixotrop moddalarni ko‘p isteʼmol qiladigan bo‘lib qoldim. O‘sha kuni ham “Regopen” degan dorini ichib olgandim. Hamda spirtli ichimlik isteʼmol qilgandim. Nazokat bilan janjallashib qoldik. Shundan so‘ng jahlim chiqib, uyda saqlab kelayotgan pichog‘imni olib, Solihga bir necha marotaba tiqdim. O‘sha vaqtda men psixotrop dori taʼsirida edim. O‘zini ruhiy kasal deb hisoblamaydi. Vaziyatni to‘g‘ri tushunadi, deydi ekspert Muhiddin Nig‘monov.
Mazkur sudning aniqlashtirishicha, 2024-yilning 9-iyul kuni Yashnobod tumanidagi ko‘p qavatli uyda ijarada yashab kelayotgan 31 yoshli erkak qonuniy nikohdan o‘tmasdan yashab kelgan ayoli bilan nizolashib, uning birinchi turmushidan tug‘ilgan o‘g‘il farzandiga pichoq bilan tan jarohatlari yetkazib, hodisa joyidan yashiringan. Bola shifoxonaga yetmay vafot etgan.
Izoh (0)