Жиноят ишлари бўйича Мирзо Улуғбек туман судида 2024 йилнинг июль ойида Тошкент шаҳрининг Яшнобод туманида содир этилган мудҳиш қотиллик — 3 ёшли болани ваҳшийларча ўлдирган 31 ёшли фуқаро иши кўрилаётгани хабар берилганди. Суднинг 25 ноябрь куни давом этган навбатдаги мажлисида Республика руҳий касалликлар шифохонасидан келган психолог-экспертлар хулосаси эшитилди.
Текширилувчи М.С.нинг билиш жараёнларида яққол ифодаланган бузилиш жараёнлари аниқланмади. Фикрлари кетма-кетликда. Индивидуал психологик хусусиятларга кўра, ўз-ўзини оқлаш тенденциясининг юқорилиги, эгоцентризм каби хусусиятлар аниқланди. Текширилувчи ижтимоий хавфли қилмиш содир этган вақтда физиологик аффект ҳолатида бўлмаган, дейди Республика руҳий касалликлар шифохонасининг психолог-эксперти Муқаддас Рустамова.
Экспертнинг маълумот беришича, гумонланувчи тергов пайтида улар билан суҳбатда воқеа ҳақида ўзи гапириб берган.
2024 йилнинг 8 июль куни тахминан психотроп модда — “Регопен” дори воситасини истеъмол қилган эдим. 9 июль куни соат 1:00 ларда шаръий никоҳдаги турмуш ўртоғим Назокат билан ўзаро келишмовчилик оқибатида бир-биримизни камситиб, темир дастлаб ўткир тиғли пичоқ билан Султонов Солиҳни тинчлантириш мақсадида бадан қисмларига бир неча маротаба шикаст етказдим. Кейин нима бўлганини эслай олмайман. Шу куни ўзимни жуда ёмон ҳис қилган эдим деган кўрсатмаларни бериб ўтган. Қолганини эса эслай олмаслигини айтган. Бу сўзлар унинг ўзининг сўзларидан ёзиб олинган, биз қўшимча киритмаймиз, деди эксперт.
Экспертга кўра, суҳбат давомида қотилликда гумонланаётган шахсда ўз-ўзини оқлаш тенденцияси кузатилган.
Биз тестлар, сўровномалар ўтказганимизда L, F, К шкалалар кўрсаткичи борда, L ва К шкалаларининг юқори чиқиши инсоннинг ўзини яхши тарафдан кўпроқ кўрсатишга эътибор берганлигини кўрсатади. Шу сабаб мен ўз-ўзини оқлаш тенденцияси юқори деган хулосани берганман, дейди у.
Экспертнинг қўшимча қилишича, қотилликда гумонланаётган шахснинг қонида психотроп моддалар, спиртли ичимликлар аниқланиши тўғридан тўғри физиологик аффект ҳолатини рад этади.
Булар руҳан соғлом. Шундай бўлса-да, ўзини касаллик ҳолатига солиш бор. Қолаверса, ўзининг гапи билан характери тескари чиққан. Шунингдек, буларда ўзини оқлаш ҳолати бўлган. Қачон одам ўзини оқлайди, руҳий соғлом бўлганда. Руҳий носоғлом одам эса хатти-ҳаракатини тўғри баҳолай олмайди, дейди Муқаддас Рустамова.
Судда гувоҳлик қилган яна бир эксперт Муҳиддин Ниғмоновнинг айтишича, қотилликда гумонланаётган шахс суд психатрия-экспертиза бўлимида текширувдан ўтиб, 2024 йилнинг 28 августидан 10 сентябрга қадар назоратда олинган.
Жиноят тўғрисида у шундай маълумот берган: Турмуш ўртоғим Назокат билан жанжаллашиб қолгандим, орамизда кўп маротаба келишмовчилик бўлар эди. Мен охирги вақтда психотроп моддаларни кўп истеъмол қиладиган бўлиб қолдим. Ўша куни ҳам “Регопен” деган дорини ичиб олгандим. Ҳамда спиртли ичимлик истеъмол қилгандим. Назокат билан жанжаллашиб қолдик. Шундан сўнг жаҳлим чиқиб, уйда сақлаб келаётган пичоғимни олиб, Солиҳга бир неча маротаба тиқдим. Ўша вақтда мен психотроп дори таъсирида эдим. Ўзини руҳий касал деб ҳисобламайди. Вазиятни тўғри тушунади, дейди эксперт Муҳиддин Ниғмонов.
Мазкур суднинг аниқлаштиришича, 2024 йилнинг 9 июль куни Яшнобод туманидаги кўп қаватли уйда ижарада яшаб келаётган 31 ёшли эркак қонуний никоҳдан ўтмасдан яшаб келган аёли билан низолашиб, унинг биринчи турмушидан туғилган ўғил фарзандига пичоқ билан тан жароҳатлари етказиб, ҳодиса жойидан яширинган. Бола шифохонага етмай вафот этган.
Изоҳ (0)