Жиноят ишлари бўйича Мирзо Улуғбек туман судида 2024 йилнинг июль ойида Тошкент шаҳрининг Яшнобод туманида содир этилган мудҳиш қотиллик воқеаси кўриб чиқилаётгани хабар берилганди. Суднинг 18 ноябрь соат 16:00 да давом этган навбатдаги мажлисида қотиллик содир этилган пайтда воқеа жойига етиб борган ИИБ ходимлари кўрсатма берди. Бу ҳақда судда қатнашган “Дарё” журналисти хабар қилди.
“Жорий йилнинг 8 июль кунидан 9 июлга ўтар кечаси тунги йўриқномадан сўнг, Яшнобод туманидаги профилактика инспектори Аваз Расулов билан бирга 197-йўналишга хизматга жалб қилиндик. Хизмат олиб бораётган вақтимизда тунги соат 01:40 ларда Яшнобод туманидаги 1-сонли навбатчилик қисмидан бизга хабар келиб тушди. Хабарда ‘Ольмос’ маҳалласидаги янги домларда оилавий катта жанжал содир бўлгани, зудлик билан воқеа жойига етиб боришимиз кераклиги айтилди. Шеригим билан ўша жойга тахминан 4-5 дақиқада етиб бордик. Борганимизда кўчада бир аёл киши ва беш-олти нафар фуқаролар бор экан. Аёл буларнинг (судланувчини кўрсатиб) аёли экан. Унинг юзларида, қўлида қон излари бор эди. Ҳолатни сўраганимизда у зудлик билан тепага чиқишимиз кераклигини, ўғли қонга беланиб ётганини айтиб, ўзининг аҳволи яхшилигини билдирди. Шундан сўнг биз профилактика инспектори билан биргаликда 2-3 нафар холис фуқаролар иштирокида 2-қаватдаги хонадонга кирдик. Уйга кирганимизда чап қўлда, эшик олдида бола бош қисми ва юз қисмида жуда катта тан жароҳатлари билан қонга беланиб ётган экан”, дейди судда гувоҳлик берган ИИБ ходими Алишер Нажимов.
Қотиллик содир этилган куни Алишер Нажимов билан воқеа жойига етиб борган профилактика инспектори Аваз Расулов жанжал содир бўлган хонадонга борганида қонга беланиб ётган бола ёнида пичоқ ҳам ётганини эслади.
“Ўша хонадонга кириб борган пайтимиз уйнинг киравериш қисмида қонга беланган пичоқ ётган эди. Ундан нарида чап қўлда эса ёш бола қонга беланиб, қўрқинчли ҳолатда яъни бош ва кўз қисми қонга беланган ҳолатда ётганди. Бу ҳақда тезкорлик билан навбатчилик қисмга, масъулларга ахборот бердик. Болага биринчи ёрдам кўрсатиш мақсадида уни чойшабга ўраб, 4-сонли шаҳар клиник шифохонага олиб кетаётганимизда онаси югуриб келиб, болам деб йиғлади”, дейди воқеага қўшимча киритган профилактика инспектори.
Алишер Нажимовга кўра, пичоқланган бола шифохонага етиб борганида шифокорлар бола кеч олиб келинганини айтиб, унинг вафот этганини маълум қилган.
ИИБ ходимларининг гувоҳлик беришича, улар болани шифохонага олиб кетган пайтда бошқа ИИБ ходимлари қотилликда гумонланган 31 ёшли фуқарони ҳам қўлга олган.
Мазкур суднинг аниқлаштиришича, 2024 йилнинг 9 июль куни Яшнобод туманидаги кўп қаватли уйда ижарада яшаб келаётган 31 ёшли эркак қонуний никоҳдан ўтмасдан яшаб келган аёли билан низолашиб, унинг биринчи турмушидан туғилган ўғил фарзандига пичоқ билан тан жароҳатлари етказиб, ҳодиса жойидан яширинган. Бола шифохонага етмай вафот этган.
Изоҳ (0)