AQSH Mudofaa vazirligining maxfiy hujjatlarini oshkor qilgan Jey Teysheyra 15 yilga qamaldi. Bu haqda Associated Press xabar berdi.
Milliy havo gvardiyasining 22 yoshli harbiysi Discord platformasi orqali maxfiy ma’lumotlarni ochiqlashda ayblangan. Ularda Ukraina qo‘shinlarining harakati va armiya ta’minoti haqida ma’lumotlar bo‘lgan.
Teysheyra 4-mart kuni josuslik to‘g‘risidagi qonunga binoan milliy mudofaa maʼlumotlarini qasddan saqlash va uzatishda aybdorligini tan olgan. U aybiga iqror bo‘lishi evaziga prokurorlar unga qo‘yilgan davlatga xiyonat ayblovini olib tashlagan.
Prokurorlar fikricha, uning harakatlari mamlakat milliy xavfsizligiga tahdid solgan, boshqa harbiylarni xavf ostiga qo‘ygan va AQSHning ittifoqdoshlari bilan munosabatlariga zarar yetkazgan. Prokuratura harbiy xizmatchi uchun 17 yillik qamoq jazosini talab qilgan. Himoya tomoni esa Teysher ma’lumotni xorijliklarga berish niyati bo‘lmagani, aksincha uni internetdagi do‘stlari bilan baham ko‘rmoqchi bo‘lganini ta’kidlab, 11 yillik qamoq jazosi so‘ragan.
Men yetkazgan barcha zarar uchun kechirim so‘ramoqchiman. Barcha mas’uliyat va oqibatlar faqat mening zimmamga tushishini anglayman. Buning ortidan keladigan har qanday oqibatni qabul qilaman, degan harbiy sud zalida.
Federal qidiruv byurosining Boston bo‘linmasi rahbari, maxsus agent Jodi Koen hukm e’lon qilingandan so‘ng, Jek Teysheyra “AQSH tarixida maxfiy ma’lumotlarni eng ko‘p oshkor qilganlardan biri” ekanini ta’kidladi.
Izoh (0)