Toshkent viloyatining Piskent tumanida avtogreyder haydovchisining ehtiyotsizligi oqibatida 24 gektarli intensiv bog‘dagi jami 16 ming tupga yaqin olxo‘ri yonib ketgan. Natijada bog‘ egasiga 2,8 mlrd so‘mga yaqin miqdorda zarar yetkazilgan.
“Daryo” muxbiri ushbu holat bilan bog‘liq sud hujjatlarini o‘rgandi.
Aniqlanishicha, “E” xususiy korxonasida avtogreyder mashinisti lavozimida ishlagan B.A. o‘ziga biriktirilgan korxonaning avtogreyderini 2024-yil 30-may kuni soat taxminan 11:30 da Piskent tumanida joylashgan “E” MCHJning olxo‘ri bog‘i yonidan o‘tgan ichki dala yo‘lida boshqarib ketayotgan bo‘lgan. Boshqaruvidagi avtogreyderning tom qismi yo‘l ustidan o‘tgan 6 kV yuqori kuchlanishdagi elektr simlariga tegishi oqibatida chaqnash kelib chiqib, yong‘in yuzaga kelgan. Ayblanuvchi hodisa ish vaqtida sodir bo‘lganini ma’lum qilgan.
Natijada ushbu hududda joylashgan “E” MCHJning 24 gektar yer maydondagi intensiv olxo‘ri bog‘ida mavjud jami 15984 tup olxo‘ri daraxtlari va tomchilatib sug‘orish tizimi nobud bo‘lgan.
O‘rganishlar davomida yetkazilgan zarar miqdori 2 milliard 808 million so‘mga baholangan.
Sud jarayonida jabrlanuvchi 2019-yilda tuman hokimligi tomonidan unga 391 gektar yer maydoni ijara asosida bog‘dorchilik va sabzavot yo‘nalishi bo‘yicha ajratilib berilgani, shundan jami 24 gektar yer maydoniga olxo‘ri ko‘chatlari ekilgani, har yili ushbu bog‘dan yiliga o‘rtacha 200 000 dollar daromad olishini, hosilni eksport yoki ichki bozorga chiqarishini bildirgan. Shuningdek, 2024-yil bahorda bog‘ga narxi 28 800 dollar bo‘lgan tomchilatib sug‘orish tizimini o‘rnatganini ham qo‘shimcha qilgan.
Sud hukmi bilan B.A. Jinoyat kodeksining 198-moddasi 1-qismi bilan aybdor deb topilib, unga nisbatan ish haqidan 20 foizini davlat daromadi hisobiga ushlab qolgan holda 1 yil axloq tuzatish ishlari jazosi tayinlangan. Shuningdek, avtogreyder xususiy korxonaga tegishli ekani, holat ish vaqtida yuz bergani inobatga olinib, yetkazilgan 2 mlrd 808 mln so‘m zarurni xususiy korxonadan undirish belgilangan.
Izoh (0)