Rayan Gosling to‘qishni yaxshi ko‘radi, Jonni Deppda qo‘g‘irchoqlar kolleksiyasi bor: sevimli mashg‘ulotlari bilan sizni hayratga soluvchi mashhurlar

Xobbi – insonning kundalik hayotiga o‘ziga xoslik va yorqinlik bag‘ishlaydigan, unga quvonch hissini beradigan mashg‘ulot. Gollivud yulduzlaridan ayrimlarining sevimli mashg‘ulotlari noodatiyligi bilan sizni hayron qoldirmasdan qo‘ymaydi.

Nikol Kidman

“Katta kichik yolg‘on” filmi yulduzi ekran orqali o‘z muxlislariga nozik va jozibali ayollar qiyofasida ko‘rinish beradi. Hayotda esa parashyutdan sakrashni juda yaxshi ko‘radi. Avstraliyalik aktrisaning parashyutdan sakrash mashg‘ulotlari uchun maxsus ruxsatnomasi ham bor. Bundan tashqari, Kidman boshqa ayollarni ham hech narsadan qo‘rqmaslikka, hayotda yangilikka intilib yashashga chaqiradi.

Bred Pitt

Amerikalik aktyor nimalarga qodir ekanligini muxlislariga allaqachon isbotlab bo‘lgan. Shuning uchun duch kelgan filmda suratga tushishga rozi bo‘lavermaydi. Eʼtiborga sazovor filmlarni birma-bir ko‘zdan kechiradi. Bo‘sh vaqtida esa kulolchilik bilan shug‘ullanishni xush ko‘radi. Sopoldan ajoyib buyumlar yasash – uning eng sevimli mashg‘ulotlaridan biri. Biroq Gollivud yulduziga qarab uning bunday antiqa xobbisi bor ekanligi xayolingizning bir chetiga ham kelmaydi.

Uill Smit

Uill Smit fikrlarini tartibga keltirish, diqqatini bir yerga jamlashga yordam beradigan sevimli mashg‘ulotini allaqachon topib bo‘lgan. U yaqin do‘stlari – Tom Kruz va Devid Bekhemlarni ham qilichbozlik sport turi bilan shug‘ullanishga ko‘ndirgan. Bu esa kutilmagan natijalarga olib keldi. Yulduzli uchlik qilichbozlik mashg‘ulotlariga doimiy ravishda qatnay boshladilar. Bundan tashqari, Tom Kruzning uyida do‘stlari uchun alohida ajratilgan xona ham bor, yulduzli uchlik aynan shu yerda to‘planib, birga vaqt o‘tkazish va suhbatlashishni xush ko‘radi.

Anjelina Joli

Maftunkor aktrisaning sevimli mashg‘uloti sizni hayratga solishi shubhasiz – u xanjarlar kolleksiya qilishga qiziqadi. Aktrisa o‘smirlik vaqtlaridayoq onasi bilan birga maxsus do‘konga borishni xush ko‘rar va bu yerdan o‘ziga yoqqan xanjarlarni sotib olardi. Taʼkidlash kerakki, ushbu qiziqish Anjelinaning o‘g‘li Meddoksga ham “yuqqan”. Jolining aytishicha, ona-bola samuraylar, qanday usullar bilan dushmanlari ustidan g‘alaba qozongani haqida suhbatlashishni yaxshi ko‘rishadi.

Rozario Douson

Yulduzlardan biri sovuq qurollarni kolleksiya qilish, boshqa biri qilichbozlik bilan shug‘ullanishga qiziqsa, Rozario Douson “Yulduzli yo‘l” franshizasining ashaddiy muxlisiga aylangan. Taniqli yulduz “Comic-Con”ga doimiy ravishda tashrif buyuradi. Qizig‘i shundaki, aktrisa klingon tilini ham o‘rganib olgan.

Rayan Gosling

“Lars va haqiqiy qiz” filmini suratga olish jarayonida aktyor o‘zi uchun yangi xobbi – to‘qishni “kashf etgan”. Rayanga to‘qish shunchalik yoqib qolganki, haligacha bo‘sh vaqti qoldi deguncha uni biror buyum to‘qib o‘tirgan holda ko‘rasiz. Dunyodagi eng yoqimtoy erkaklardan biri deya tan olingan aktyor o‘z intervyularida to‘qish bilan kechgacha shug‘ullangan kunini mukammal kun deb bilishi haqida aytib o‘tgan. Gosling sevimli mashg‘uloti bilan band bo‘lgan vaqtda uni birov bezovta qilib qo‘ymasa, aktyor ajoyib sharfni to‘qib bitiradi.

Tom Xenks

Afsonaviy aktyorning o‘ziga xos qiziqishi bor – u eski yozuv mashinkalarini kolleksiya qilish bilan shug‘ullanadi. Buni haqiqatdan qiziqarli va noodatiy xobbi deyish mumkin. Aktyor 19 yoshida o‘ziga yoqib qolgan eski yozuv mashinkasini xarid qilgan va o‘sha vaqtlardan beri ularni kolleksiya qilish bilan shug‘ullanib keladi. Shu bilan birga aktyor kelajakda mashinkalarining barchasini tarqatib yuborishi va o‘zi bilan faqatgina bitta nusxani olib qolishini aytib o‘tgan.

Syuzan Sarandon

Gollivud aktrisasi o‘zining saʼy-harakatlari bilan xobbi insonga yaxshigina daromad olib kelishi mumkinligini isbotlab bergan. Syuzan ko‘p yillardan buyon ping-pong o‘ynash bilan shug‘ullanadi. Ping-pong sportiga bo‘lgan qiziqish uni shu uslubda jihozlangan bar ochishga undagan. Sarandon bunday qaror unga daromad keltirishi mumkinligini o‘ylab ham ko‘rmagan. Bugun esa unga tegishli barda ping-pong bo‘yicha turnirlar, ligalar va qizg‘in musobaqalar o‘tkazib kelinadi.

Jonni Depp

Siz sevgan Jonni Depp Barbi qo‘g‘irchoqlarini yaxshi ko‘rishiga ishona olasizmi? Buning haqiqatdan noodatiy qiziqish ekanligini aktyorning yaqinlari ham tan olgan. Ijodkorning aytishicha, u qo‘g‘irchoqlar bilan o‘ynashga usta. Aktyorda bunday noodatiy qiziqish paydo bo‘lishiga uning qizi sababchi. Qo‘g‘irchoqlar ota-bola o‘rtasidagi munosabatlarni mustahkamlashga ham yordam bergan.

Nikolas Keyj

Tim Byorton o‘z vaqtida “Supermen” haqidagi filmda suratga tushishni xohlagan. Ssenariy ham, liboslar ham, bosh rol ijrochisi ham tayyor bo‘lgan. Internetdan hattoki ijodkorning superqahramon libosini kiyib tushgan rasmlarini ham topish mumkin. Biroq studiya tez orada loyihani bekor qilgan. Rejissor ko‘p o‘tmay film haqida unutib yuborgan, Nikolas esa yo‘q. Uning ushbu qahramonga bo‘lgan qiziqishi shunchalik kuchayib ketganki, ijodkor bugungi kunga qadar Klark Kentga bag‘ishlangan buyumlarni kolleksiya qilish bilan shug‘ullanib keladi.