Ikkinchi men: roli hayotining bir qismiga aylanib ketgan Gollivud aktyorlari

Odatda aktyorlar suratga olish maydonchasini tark etishi bilan obrazdan ham chiqib ketishi kerak. Ammo ba’zi aktyorlar buning uddasidan chiqolmadi. Qiziq, qaysi yulduzlarga ularning qahramoni katta ta’sir qilgan? 

Ledi Gaga

“Guchchi uyi” Ledi Gaganing birinchi loyihasi emas. Biroq bu film yulduzga alohida ta’sir ko‘rsatadi. Roli ishonchli chiqishi uchun xonanda uch yil davomida yuz ifodalarini, artikulyatsiyasini va hatto aksentini o‘zgartiradi. Hammasi Patritsiya Rejani obrazi ishonchli chiqishi uchun edi.

To‘g‘risini aytsam, Rejani kabi bir yarim yil yashadim. To‘qqiz oy davomida aksent bilan gapirdim, hatto sahna ortida ham. Bu obraz har doim men bilan birga bo‘ldi.

Bill Skarsgard

Billning ajoyib ijrosi nafaqat muxlislar, balki tanqidchilar tomonidan ham yuqori baholanadi. Bu ajablanarli emas, chunki undan qo‘rqinchli masxarabozni topish qiyin. Biroq Skarsgadrning o‘zi uning yovuz qiyofasi ta’siriga tushib qoladi:

Bu juda g‘alati edi. Uch oylik suratga olish jarayonida men masxaraboz Pennivays bilan birga yashadim. Men u haqida hammadan ko‘ra ko‘proq o‘ylardim, uni qon tomirimda ham his qilardim — u haqida o‘ylamasdan turolmasdim. Men o‘ynagan har bir qahramon qandaydir yaqin odamimga aylanadi, lekin Pennivays va men juda halokatli munosabatlarga ega edik. Albatta, barcha holatlarda bo‘lgani kabi bu qanchalik dahshatli ekanligini tushunish uchun bu munosabatlardan chiqish kerak edi.

Jared Leto

Professional qotillar jamoasi haqidagi filmni aqldan ozgan Joker va uning jo‘shqin qiz do‘sti Xarli Kuinnsiz tasavvur qilish qiyin. Jared aqldan ozgan odamning kayfiyatini shunchalik aniq yetkazadiki, hatto uning suratga olish maydonchasidagi hamkasblari ham Letodan qo‘rqadi.

Jared haqiqiy Jokerga aylangandi, u o‘zini Joker kabi his qilardi. U hatto hazillashmas, nihoyatda jiddiy edi. Aktyor sifatida u rolga butunlay kirishib ketgandi, — deydi Uill Smit.

Leonardo Di Kaprio

“Omon qolgan” filmida aktyor g‘ayrioddiy narsalarni iste’mol qilishiga to‘g‘ri keladi. Aktyor tanasining reaksiyasini oxirgi kadrlarda ko‘rish mumkin.

Muzli daryoga kirib-chiqib, hayvon jasadida uxlash. Men doimo dahshatli darajada sovqotardim, ehtimol hatto muntazam ravishda gipotermiyani boshdan kechirardim. Albatta, har kuni bizon jigarini yemasdim. Ammo filmni tomosha qilganingizda, bunga bo‘lgan reaksiyamni ko‘rasiz, chunki rejissyor uni montaj paytida qoldirishga qaror qilgan. Bu instinktiv reaksiya edi.

Xoakin Feniks

Yomon odam bo‘lish oson emas, ayniqsa, Joker bo‘lish. Afsonaviy personajni o‘ynash uchun Xoakin Feniks juda ko‘p vazn yo‘qotishi kerak edi. Bundan tashqari, bunday rolga kirishib ketish ruhiyat uchun yaxshi oqibatlarga olib kelmasdi.

Bilasizmi, qisqa vaqt ichida juda ko‘p vazn yo‘qotsangiz, ruhiyatingizga ham ta’sir qiladi. Men ham doimiy ravishda Jokerning kulishini mashq qilardim, shuning uchun ba’zida aqldan ozmayapmanmi, deb o‘ylardim, — deydi Xoakin.

Tom Holland

“O‘rgimchak odam”dan keyin dramatik rolga tayyorlanish oson emas. Ammo Tom buni uddalaydi. Biroq aktyorning so‘zlariga ko‘ra, bunga juda ko‘p kuch sarflagan. Billi Milliganni o‘ynash shunchalik qiyin bo‘ladiki, suratga olish ishlaridan so‘ng Holland bir muncha vaqt kinoni tark etadi.

Bu obraz menga juda yoqdi, lekin film meni sindirdi. Dam olishim kerak, deb o‘ylagan paytlarimda yo‘q bo‘lib ketdim, bir haftaga Meksikaga bordim, sohilda biroz vaqt o‘tkazdim, yotdim — bir yil dam oldim. Buning sababi rol juda murakkab edi.