Baribir yig‘latadi: sevgi, oila va o‘zlikni anglash haqidagi eng ta’sirli filmlar

Agar kayfiyatingiz tushib ketgan bo‘lsa-yu, ko‘nglingizni bo‘shatib olishni istasangiz, bunday vaqtda sevgi, oila va o‘zlikni topish haqidagi ta’sirli filmlar tomosha qilishni tavsiya qilamiz.

“Nikoh tarixi” (2019)

• Janr: drama, melodrama
• Rejissyor: Noa Baumbak
• Rollarda: Skarlett Yoxansson, Adam Drayver, Laura Dern, Alan Alda, Rey Liotta

Ajoyib oilaning qulashi tarixi: Charli Barber (Adam Drayver) va uning rafiqasi Nikol (Skarlett Yoxansson) ajrashadi. Biroq rozilik asosida ajralish ikki mag‘lubning shiddatli jangiga aylanadi.

“Roma” (2018)

• Janr: drama
• Rejissyor: Alfonso Kuaron
• Rollarda: Yalitsa Aparisio, Marina De Tavira, Diego Kortina Otri, Karlos Peralta, Marko Graf

2019-yilda ushbu film uchun “Oskar”ni qo‘lga kiritgan Alfonso Kuaron meksikalik xizmatchi Kleoning Mexikoning boy hududlardan biri bo‘lgan Romaning badavlat uylaridan biridagi hayoti haqida hikoya qiladi. U Antonio va Sofiyaga to‘rt farzandini katta qilishda yordam beradi. To‘satdan oila boshlig‘i Antonio ma’shuqasi bilan qochib ketadi, ayni paytda yigiti tashlab ketgan Kleo ham homiladorligini bilib qoladi. Umumiy qayg‘u bilan birlashgan ayollar bolalar bilan sayohatga chiqadi. Ular xotiralar va ichki og‘riqlarga dosh berib, hayotlarini davom ettirishga harakat qilishadi.

“Xonqizi” (2017)

• Janr: drama, komediya
• Rejissyor: Greta Gervig
• Rollarda: Sirsha Ronan, Lori Metkaf, Treysi Letts, Lukas Hejes, Timoti Shalame

Greta Gervigning oilasidan uni “xonqizi” deb atashlarini talab qiladigan qaysar, ammo maftunkor o‘spirin qiz haqidagi ta’sirchan dramasi. Gervigning rejissyorlik debyuti bolalik va kattalik o‘rtasidagi davrda ota-onalar va bolalar o‘rtasidagi ziddiyatni mukammal tarzda aks ettiradi. Bir yarim soat davom etadigan ta’sirchan, biroz qayg‘uli va biroz kulgili film.

“90-yillarning o‘rtalari” (2018)

• Janr: drama, komediya
• Rejissyor: Jona Hill
• Rollarda: Sanni Suljik, Ketrin Uoterston, Lukas Xejes, Na-kel Smit, Olan Prenatt

Bu onasining e’tiboridan mahrum va do‘stlar topishga intilayotgan, badjahl akasi bilan yashaydigan yolg‘iz bolaning hikoyasi. Bir payt u skeytchilar to‘dasiga qabul qilinadi — kunlarini chekish va skeyt uchish bilan o‘tkazadigan katta yoshli yigitlar guruhi. 13 yoshli Stivining skeytbordingni o‘zlashtirishga bo‘lgan urinishlari jarohatlarga olib kelganidek, uning aslidek bo‘lishga urinishlari ham bir qator dahshatli oqibatlarga olib keladi.

“Shirin bola” (2019)

• Janr: drama
• Rejissyor: Alma Xarel
• Rollarda: Shaya Labaf, Lukas Hejes, Noa Jup, Bayron Bauers, Lora San Jakomo

Bosh qahramon — o‘zini o‘ldirishga moyil bo‘lgan mashhur aktyor bo‘lib, u reabilitatsiya markaziga tushadi. U yerda psixoterapevt aktyorga stolga o‘tirishni va butun g‘azabini qog‘ozga to‘kishni maslahat beradi. Qahramon o‘tmishni eslay boshlaydi va bolaligiga qaytadi: u 12 yoshda, o‘g‘lining erta muvaffaqiyatidan qo‘rqqan yoki g‘azablangan otasi bilan yashaydigan yosh aktyor. Ota rolini Shaya Labaf o‘ynaydi va o‘g‘il rolini kichik aktyor Noa Jup ijro etadi. Labaf reabilitatsiya davrida “Shirin bola” (aktyorning bolalikdagi laqabi) ssenariysini yozgan va bu matn haqiqatan ham u uchun terapiyaning bir qismiga aylangan.

“Sevgi bu — kasallik” (2017)

• Janr:drama, melodrama, komediya
• Rejissyor: Maykl Shovalter
• Rollarda: Kumail Nanjiani, Zoe Kazan, Xolli Xanter, Rey Romano, Anupam Kher

Pokistonlik komik Kumail Nanjiani va uning rafiqasi Emilining yarim avtobiografik hikoyasi. Birinchi navbatda bu irqlararo munosabatlar va madaniyatlar to‘qnashuvi muammolari haqidagi film. Lekin uni sentimental va maftunkor sevgi hikoyasi deyish ham mumkin.

“Kapitan Fantastik” (2016)

• Janr: drama
• Rejissyor: Mett Ross
• Rollarda: Viggo Mortensen, Jorj Makkay, Samanta Isler, Annalisa Basso, Nikolas Xemilton

Film Vashington shtati cho‘lining o‘rtasida, texnologiya va transportdan uzoqda olti farzandi bilan yashaydigan er-xotin haqida. Ular kapitalizm ideallaridan hafsalasi pir bo‘lgach, hayotni o‘z qo‘llariga olishga va bolalarga omon qolish ko‘nikmalarini o‘rgatishga qaror qilishadi - masalan, ular ov qilishni va quroldan foydalanishni biladi. Biroq oila hayotida fojia yuz beradi — Ben (Viggo Mortensen)ning rafiqasi Lesli vafot etadi. Bu uni hayot tarzini qayta ko‘rib chiqishga va katta dunyoga chiqishga majbur qiladi.

“Ota” (2020)

• Janr: drama
• Rejissyor: Florian Zeller
• Rollarda: Entoni Xopkins, Oliviya Kolman, Rufus Syuell, Oliviya Uilyams, Mark Gatiss

Londondagi hashamatli uyida vaysaqi qariya Entoni asta-sekin qarimoqda. U hali ham kuchli ekanligiga va hamma narsani o‘zi hal qila olishiga ishonadi, lekin undan tashvishlangan qizi (Olivia Kolman) unga yordamchi yollamoqchi. O‘jar Entoni barcha nomzodlarni rad etadi, bu orada uning kvartirasida g‘alati voqealar sodir bo‘la boshlaydi. Demensiyaga chalingan odamni ajoyib tarzda o‘ynagan uchun Xopkins ikkinchi marta “Oskar” oladi.

“Katta yumilgan ko‘zlar bilan” (1999)

• Janr: triller, drama, detektiv
• Rejissyor: Stenli Kubrik
• Rollarda: Tom Kruz, Nikol Kidman, Sidney Pollak, Mariya Richardson, Rade Serbedziya

Stenli Kubrikning ushbu filmi — Tom Kruz va Nikol Kidman birgalikda suratga tushgan oxirgi filmdir. Bu turmush qurganlarning hikoyasi: juftlik shahvoniy istaklari orqali bir-birlari haqida qorong‘i haqiqatlarni kashf etadilar.

“Xayr, Kristofer Robin” (2017)

• Janr: drama, oilaviy, biografiya
• Rejissyor: Saymon Kertis
• Bosh rollarda: Donal Glison, Margo Robbi, Kelli Makdonald, Viki Pepperdin, Uill Tilston

Yozuvchi Alan Miln (Donal Glison) — Birinchi jahon urushi qatnashchisi. Uyga qaytgach, Miln travmadan keyingi stress buzilishini boshdan kechiradi va bir satr ham yoza olmaydi. Shuning uchun u xotini va o‘g‘li bilan London markazidan o‘rmonga ko‘chib o‘tadi. Doimiy qabullar va ijtimoiy hayotga o‘rgangan rafiqasi (Margo Robbi) tez orada poytaxtga qaytadi va yozuvchini kichkina o‘g‘li Kristofer Robin bilan yolg‘iz qoldiradi. Shu paytdan boshlab Vinni Puh ismli ayiqchaning hikoyasi boshlanadi.

“O‘lik shoirlar jamiyati” (1989)

• Janr: drama
• Rejissyor: Piter Uir
• Rollarda: Robin Uilyams, Robert Shon Leonard, Ethan Xok, Josh Charlz, Geyl Xansen

Jon Kiting (Robin Uilyams) xususiy o‘g‘il bolalar maktabiga ishga kelgan o‘rindosh o‘qituvchi. O‘smirlar ta’sirchan bolalardir, shuning uchun ular tezda yangi o‘qituvchiga o‘rganib qolishadi. Kiting ayni damdan zavqlanib yashash g‘oyasini targ‘ib qiladi, bu esa o‘quvchilarning ota-onalariga yoqmaydi. Tez orada sevimli mashg‘ulot sifatida ochilgan to‘garak yashirin jamiyatga aylanadi va o‘qituvchi katta muammolarga duch kela boshlaydi.

“Tungi tinglovchi” (2006)

• Janr: detektiv, drama, triller
• Rejissyor: Patrik Stettner
• Rollarda: Toni Kollett, Robin Uilyams, Jo Morton, Bobbi Kannaval, Rori Kalkin

Radiostansiyalardan birida o‘zining ijtimoiy shousini olib boradigan taniqli yozuvchi va radio boshlovchisi Gabriel Nuna (Robin Uilyams) haqidagi Piter Stettnerning psixologik dramasi. Har oqshom Gabriel qiyin hayotiy vaziyatlarga tushib qolgan odamlar haqida hikoya qiladi. Bir kuni Pit (Rori Kalkin) ismli o‘smirning hikoyasi uning qo‘liga tushib qoladi: bola og‘ir kasal bo‘lib, asrab olgan onasi (Toni Kollett) o‘g‘lini biologik ota-onasidan yashiradi. Gabriel nimadir noto‘g‘ri ekanligini sezadi va Pitni qutqarish uchun buning iziga tushadi.