“Yomon yigitlar”, “Olovuddin”, “Men afsonaman” va “Qirol Richard” kabi filmlar bilan tanilgan Gollivud yulduzi Uill Smit hamda uning rafiqasi Jada farzand kutmoqda. Bu haqda “Korrespondent.net” nashri xabar berdi.
Media Take Out nashri ma’lumotlariga ko‘ra, 55 yoshli Uill va 52 yoshli Jada Smitlar surrogat onalik xizmatiga murojaat qilgan. Avvalroq Jada 2016-yildan beri turmush o‘rtog‘i bilan birga yashamaganini aytgandi, ammo juftlik ajrimga rasman ariza bermagan.
Jada va Uill Smit 1997-yilda turmush qurgan. Ularning ikki nafar farzandi — qizi Uillou va o‘g‘li Jeyden bor. Er-xotin salkam 7 yildan beri birga yashamasa-da, Uill Smit rafiqasining sha’nini doim himoya qilib kelgan. Xususan, 2022-yilda Kris Rok “Oskar” mukofotini topshirish marosimida Jadaning boshida soch yo‘qligi haqida hazil qilganidan so‘ng Uill uning yuziga tarsaki tushirgan.
Ma’lumot uchun: Uill Smitning tadbirkor ayol Sheri Zampino bilan nikohidan Uillard Kristofer Smit ismli bir nafar o‘g‘li bor.
Izoh (0)