Rejissyorlar film muvaffaqiyati uchun aktyorlarga juda ko‘p pul tikadi. Ayniqsa, asar Gollivudning eng kassabop filmlaridan biriga aylanishida aktyorlar ijro etgan roli muhim ahamiyatga ega. Ba’zi yulduzlar shunchalik katta miqdorda gonorar oladiki, ularning maoshi film byudjetining yarmini tashkil qiladi.
Bryus Uillis — “Oltinchi tuyg‘u”
So‘nggi yillarda afaziyadan aziyat chekayotgan Bryus Uillis yaxshi gonorar uchun mutlaqo har qanday rolni o‘ynashga majbur bo‘lgan. Shunday qilib, Bryus haqiqiy klassikada rol o‘ynagan mashhur aktyordan sifatsiz jangari filmlarning yulduziga aylandi. Biroq shunday vaqtlar bo‘ldiki, Bryusning bitta filmi uning boshqa o‘nta asarining o‘rnini bosgan.
Uillis Malkolm Krou ismli psixolog rolini o‘ynagan “Oltinchi tuyg‘u” filmi uchun unga 14 million dollar taklif qilishadi. Film byudjeti 40 millionni tashkil qilgan. Biroq Bryus gonorarini kinoteatrlar va DVD to‘lovlarining 17 foiziga almashtirishni taklif qiladi. Natijada “Oltinchi tuyg‘u” 672 million daromad ko‘radi, aktyor esa kamida 114 million dollar ishlab oladi.
Kianu Rivz — “Matritsa: qayta ishga tushirish” va “Matritsa: inqilob”
Aktyor Kianu Rivz ushbu filmda o‘z maqsadini aniq biladigan va o‘ziga ishonchi baland qahramonni ijro etgan. Uning jangini tomosha qilish muxlislarga haqiqiy zavq beradi. Aktyor avvalida film uchun 15 million dollar gonorarga rozi bo‘lgan, biroq uning agenti film kassasining 15 foizini olishni taklif etgan va aktyor bunga rozi bo‘lgan. Yuqori natijalarni ko‘rsatgan “Matritsa”ning uchinchi qismi Kianuga 126 million dollar daromad olib keldi va shu tariqa u 2003-yilning eng ko‘p daromad olgan aktyorlaridan biriga aylandi.
Shunday bo‘lsa-da, Kianu Rivz yulduzlik kasalligiga chalinmagan sanoqli aktyorlardan biri sanaladi. Xayrli ishlarni ham yaxshi ko‘ruvchi Kianu 80 million dollar gonorarini film dizaynerlari hamda maxsus effektlari uchun mas’ul bo‘lgan jamoaga tarqatib yuborgan. 12 nafar kaskadyorga esa yangi mototsikl sovg‘a qilgan.
Tom Kruz — “Dunyolar jangi”
Aktyor Tom Kruz ishtirok etgan eng yaxshi filmlardan biriga aylangan “Dunyolar jangi” rejissyor Stiven Spilberg tomonidan suratga olingan. Asar Gerbert Uells romani asosida yaratilgan. Filmni suratga olish ishlari bir necha oy davom etgan va Tom kaskadyorlar yordamisiz barcha murakkab harakatlarni mustaqil bajargan. Film uchun Tom Kruz 100 million dollar gonorar olgan. Bu kassa tushumlarining 20 foizini tashkil etadi.
Sem Uortington — “Avatar: suv yo‘li”
Sem Uortingtonni “Avatar” filmidagi bosh rolga tasdiqlashdan oldin rejissyor Jeyms Kemeron bu rolni Mett Deymonga taklif qiladi, ammo Mett rad etadi, chunki u navbatdagi “Born” filmining suratga olish ishlari bilan band edi. Keyinchalik aktyor bu rolni rad etganidan afsusda ekanligini tan oladi, chunki Kemeron unga barcha daromadlarning 10 foizini taklif qilgan, bunday holda uning gonorari deyarli 300 million dollarga yetardi, bu Kianu Rivznikidan ancha ko‘p. Qizig‘i shundaki, Jeyms Kemeron Sem Uortingtonga Deymonga taklif qilgan shartlarni qo‘ymaydi.
Ammo aktyor bir necha yil o‘tgach, “Avatar”ning ikkinchi filmi uchun shartnoma imzolagandan so‘ng unga qat’iy belgilangan 10 million dollar va yig‘imning 5 foizi taklif qilinadi. Garchi “Avatar: suv yo‘li” birinchi filmdan kamroq daromad keltirgan bo‘lsa-da, bu Uortingtonning 110 milliondan ortiq daromad topishi uchun yetarli edi.
Uill Smit — “Qora libos kiygan odamlar-3”
Aktyor Uill Smit filmning uchinchi qismida ham barchaga tanish bo‘lgan Jey rolini ijro etdi. Uning qahramoni avvalgidek ajoyib va pozitiv xarakterli shaxs sifatida tasvirlangani bois Uill muxlislarini yanada shod etdi.
Aktyor filmdagi roli uchun 18 million dollarlik shartnoma imzolagan hamda kassa tushumlarining 15 foizini olishni rejalashtirgan edi. Film 624 million dollar daromadga chiqqanda Smit 100 million dollardan ko‘proq maosh olishga erishdi va u tarixdagi eng ko‘p daromad oladigan aktyorlardan biriga aylandi.
Izoh (0)