Sudanning Darfur mintaqasida so‘nggi yillardagi eng yirik vabo (xolera) epidemiyasi yuz bermoqda. Xususan, oxirgi bir hafta ichida mamlakatda 40 kishi ushbu kasallikdan vafot etdi. Bu haqda “Chegarasiz shifokorlar” (MSF) tashkilotiga tayanib, Al Arabiya xabar berdi.
Tashkilotning 14-avgust kuni bergan bayonotiga ko‘ra, urushdan eng ko‘p zarar ko‘rgan hudud — Darfur so‘nggi bir yil ichida boshlangan xolera tarqalishidan eng jiddiy talafot ko‘rmoqda. Birgina o‘tgan haftaning o‘zida MSF jamoalari 2 300 dan ortiq bemorni davolagan va 40 o‘lim holatini qayd etgan.
Rasmiy ma’lumotlarga ko‘ra, 2023-yil avgustidan beri butun mamlakat bo‘ylab 99 700 dan ortiq gumon qilingan xolera holati va 2 470 o‘lim qayd etilgan. Vabo najas orqali ifloslangan oziq-ovqat yoki suv orqali yuqadi. U kuchli diareya, qusish va mushak tortishishini keltirib chiqaradi hamda davolanmagan taqdirda bir necha soat ichida o‘limga olib kelishi mumkin.
MSF urush sabab millionlab aholining uyini tark etishga majbur bo‘lishi va toza ichimlik suvi tanqisligi epidemiyani yanada kuchaytirganini ta’kidlamoqda.
“BMT ma’lumotlariga ko‘ra, Shimoliy Darfurdagi Tavila shahrida urushdan qochgan 380 ming kishi yashamoqda. Ular kuniga o‘rtacha atigi 3 litr suv ichadi, bu esa ichimlik, ovqat pishirish va gigiyena uchun belgilangan eng kam me’yordan (7,5 litr) ikki baravar kam”, deyiladi MSF bayonotida.
Og‘ir sharoitlar tufayli ko‘plab oilalar ifloslangan manbalardan suv ichishga majbur, bu kasallik tarqalishini tezlashtirmoqda. Hatto yaqinda bir lagerdagi quduqdan odam jasadi topilgan, biroq ikki kundan so‘ng odamlar yana o‘sha suvni ichishga majbur bo‘lgan.
Kuchli yomg‘irlar suv manbalarini yanada ifloslantirib, kanalizatsiya tizimlarini ishdan chiqarmoqda. Urushdan qochayotganlar bilan birga kasallik nafaqat Sudan bo‘ylab, balki qo‘shni Chad va Janubiy Sudanga ham tarqalmoqda. MSF’ning Sudan bo‘yicha rahbari Tuna Turkmen vaziyatni juda jiddiy ekanini bildirib, shunday dedi:
“Urushdan omon qolgan odamlar davolash mumkin bo‘lgan kasallikdan o‘lmasligi kerak”.
Izoh (0)