Birgina film uchun 100 million dollardan ortiq gonorar olgan jahon kino yulduzlari

Rejissyorlar film muvaffaqiyati uchun aktyorlarga juda ko‘p pul tikadi. Ayniqsa, asar Gollivudning eng kassabop filmlaridan biriga aylanishida aktyorlar ijro etgan roli muhim ahamiyatga ega. Ba’zi yulduzlar shunchalik katta miqdorda gonorar oladiki, ularning maoshi film byudjetining yarmini tashkil qiladi. Quyida mashhur aktyorlarga sarmoya kiritish orqali muvaffaqiyat olib kelgan filmlar va aktyorlarning gonorari haqida so‘zlashamiz.

Uill Smit, “Qora libosdagi odamlar 3” (2012)

Gonorar: 100 million dollar

Aktyor Uill Smit filmning uchinchi qismida ham barchaga tanish bo‘lgan Jey rolini ijro etdi. Uning qahramoni avvalgidek ajoyib va pozitiv xarakterli shaxs sifatida tasvirlangani bois Uill muxlislarini yanada shod etdi.

Aktyor filmdagi roli uchun 18 million dollarlik shartnoma imzolagan hamda kassa tushumlarining 15 foizini olishni rejalashtirgan edi. Film 624 million dollar daromadga chiqqanda Smit 100 million dollardan ko‘proq maosh olishga erishdi va u tarixdagi eng ko‘p daromad oladigan aktyorlardan biriga aylandi

Tom Kruz, “Dunyolar jangi” (2005)

Gonorar: 100 million dollar

Aktyor Tom Kruz ishtirok etgan eng yaxshi filmlardan biriga aylangan “Dunyolar jangi” rejissyor Stiven Spilberg tomonidan suratga olingan. Asar Gerbert Uells romani asosida yaratilgan. Filmni suratga olish ishlari bir necha oy davom etgan va Tom kaskadyorlar yordamisiz barcha murakkab harakatlarni mustaqil bajargan.

Film uchun Tom Kruz 100 million dollar gonorar olgan. Bu kassa tushumlarining 20 foizini tashkil etadi.

Bryus Uillis, “Oltinchi hissiyot” (1999)

Gonorar: 120 million dollar

“Oltinchi hissiyot” filmida aktyor Bryus Uillis o‘zini serqirra ijodkor ekanini isbotladi. Filmda u barchaning muammosini chuqur his etadigan psixiatr rolini ijro etgan. Film aktyorning nafaqat jangari filmlarda, balki drama yo‘nalishida ham yuqori iste’dod sohibi ekanligini isbotladi.

Bryus Uillis mazkur rol uchun 14 million dollar gonorar hamda film daromadining 17 foizini olgan. Bularning barchasi unga jami 120 million dollar gonorar keltirdi.

Kianu Rivz, “Matritsa: qayta yuklash” (2003)

Gonorar: 126 million dollar

Aktyor Kianu Rivz ushbu filmda o‘z maqsadini aniq biladigan va o‘ziga ishonchi baland qahramonni ijro etgan. Uning jangini tomosha qilish muxlislarga haqiqiy zavq beradi.

Aktyor avvalida film uchun 15 million dollar gonorarga rozi bo‘lgan, biroq uning agenti film kassasining 15 foizini olishni taklif etgan va aktyor bunga rozi bo‘lgan. Yuqori natijalarni ko‘rsatgan “Matritsa” ning uchinchi qismi Kianuga 126 million dollar daromad olib keldi va shu tariqa u 2003-yilning eng ko‘p daromad olgan aktyorlardan biriga aylandi.

Shunday bo‘lsa-da, Kianu Rivz yulduzlik kasalligiga chalinmagan sanoqli aktyorlardan biri sanaladi. Xayrli ishlarni ham yaxshi ko‘ruvchi Kianu 80 million dollar gonorarini film dizaynerlari hamda maxsus effektlari uchun mas’ul bo‘lgan jamoaga tarqatib yuborgan. 12 nafar kaskadyorga esa yangi mototsikl sovg‘a qilgan.