ListChallenges portali dunyodagi eng go‘zal aktrisalar ro‘yxatini tuzdi. Yigirmatalikka nafaqat o‘z iqtidori, balki jozibali tashqi ko‘rinishi bilan butun dunyodagi muxlislar hurmat va e’tiborini zabt etgan yulduzlar kiritildi.
Eng go‘zal aktrisalar reytingida 20-o‘rinni Salma Hayek egalladi. 57 yoshli aktrisa Meksikada tug‘ilgan va karyerasini o‘z vatanida boshlagan. U “Tereza” va “Qurbon bo‘lgan muhabbat” telenovellalarida rol o‘ynaganidan keyin mashhurlik cho‘qqisiga chiqdi.
Ikkinchi film unga BAFTA’ning o‘ziga xos meksikacha ekvivalenti — Ariel mukofotini olib keldi. Ammo yulduz bundan ham ko‘prog‘ini xohlardi, tavakkal qilishga tayyor edi. Shu tariqa u 1991-yilda Gollivudga yo‘l oldi.
Bir nechta epizodik rollardan so‘ng, aktrisa o‘zining birinchi asosiy rolini oladi: Antonio Banderas bilan birga “Umidsiz” filmida rol o‘ynaydi. Shundan keyin Jorj Kluni, Uill Smit va Penelopa Kruz kabi boshqa yulduzlar ishtirokidagi loyihalarda ishtirok etdi. Hayek “Frida” filmidagi bosh roli uchun “Oskar” mukofotiga nomzod bo‘lgan.
Ro‘yxatning keyingi o‘rinlariga 2011-yilda 79 yoshida vafot etgan aktrisa Elizabet Teylor kiritildi. U Gollivudning eng go‘zal aktrisalaridan biri hisoblangan va ikki karra “Oskar”ni qo‘lga kiritgan. Elizabet o‘n yoshida filmlarda rol o‘ynay boshlagan.
1956-yilda u Jeyms Din bilan birgalikda “Gigant” filmida rol ijro etdi. Teylorga “Kleopatra” filmi eng katta muvaffaqiyatni olib keldi. Aktrisa 79 yoshida yurak yetishmovchiligidan vafot etgan.
Greys Kelli ham kuchli yigirmatalikka kiritildi. U 1929-yilda badavlat oilada tug‘ilgan va bolaligidan aktyorlik faoliyatini boshlagan. 1955-yilda Kelli “Qishloqlik qiz” dramasidagi roli uchun “Oskar”ga sazovor bo‘ldi.
1956-yilda esa u Monako knyazi Renye III bilan turmush qurgach, Greys Kelli kinodagi faoliyatiga yakun yasadi. U 1982-yil 13-sentyabrda avtohalokatda vafot etdi.
Fransuz kino yulduzi Brijit Bardo ham eng latofatli aktrisalar ro‘yxatidan o‘rin oldi.
U 1956-yilda suratga olingan “Va Xudo ayolni yaratdi” filmida suratga tushganidan so‘ng jahon miqyosida shuhrat qozongan. Aktrisa hozir 89 yoshda bo‘lib, 1973-yilda aktyorlik faoliyatini yakunlaganini e’lon qilgandi.
Reytingda keyingi o‘rinni “Zorro niqobi” va “Tuzoq” kabi filmlar orqali mashhur bo‘lgan aktrisa Ketrin Zeta-Jons egalladi. U “Chikago” myuziklidagi roli uchun “Oskar”ga, shuningdek, “Tungi musiqa” filmidagi ijrosi uchun “Toni” mukofotiga sazovor bo‘lgan.
2004-yilda Zeta-Jons Tom Henks bilan birgalikda Stiven Spilbergning “Terminal” filmida rol o‘ynagan, shuningdek, Jorj Kluni va Bred Pitt bilan “Oushenning o‘n ikki dugonasi” kriminal komediyasida suratga tushgan.
25 yosh farqqa qaramay Ketrin Zet-Jons 1998-yilda aktyor Maykl Duglas bilan turmush qurdi. Hozirda juftlikning ikki nafar farzandi bor.
Go‘zal aktrisalar reytingida “Jeyms Bondning qallig‘i” ham o‘rin oldi. Shveysariyalik kinoaktrisa Ursula Andress Jeyms Bond haqidagi birinchi film bo‘lgan “Doktor No” filmida Agent 007 ning sevgilisi rolini ijro etdi. Bu rol Ursula karyerasining cho‘qqisi bo‘lib qoldi, chunki keyingi yillar davomida u filmlarda kamroq chiqa boshladi. Hozirda model va aktrisa 88 yoshda, u oilasi bilan Yevropada yashaydi.
Eng go‘zal va maftunkor aktrisalar beshtaligida 2023-yilda 82 yoshida vafot etgan Rakel Uelch ham bor. Turmush o‘rtog‘i bilan ajrashgach, u ikki farzandi bilan yolg‘iz qoldi va moda ko‘rgazmalarida model sifatida qatnashib, tirikchilik qila boshladi.
So‘ng u o‘zini Gollivudda sinashga qaror qildi va “Fantastik sayohat” hamda “Miloddan avvalgi bir million yil” filmlarida ishtirok etdi. Mazkur loyihalar aktrisaga katta muvaffaqiyat va moliyaviy barqarorlik olib keldi. 1975-yilda Rakel “Uch mushketyor” filmidagi roli uchun “Oltin globus” mukofotini qo‘lga kiritdi.
Reytingdagi kuchli uchtalikni aktrisa Anjelina Joli ochib berdi. “Oskar” mukofoti sovrindori, shuningdek, uch karra “Oltin globus” mukofoti va ikki marta kino gildiyasi mukofoti sovrindori bo‘lgan Anjelina Joli BMTning ezgu niyat elchisi hamdir.
Uning jahon miqyosidagi muvaffaqiyatiga “Janob Smit va Smit xonim” filmi sabab bo‘ldi. Loyihada u Bred Pitt bilan tanishdi va bir necha yillardan so‘ng juftlik oila qurdi. Hozirda ular rasman ajrashgan.
Ikkinchi o‘rinni 1947-yilda namoyish etilgan “Jazda faqat qizlar” musiqiy filmida rol o‘ynagan Merilin Monro egalladi. 1950-yilda Merilin “Asfaltli changalzor” filmida kichik rol o‘ynaydi.
Keyin u “Tundagi to‘qnashuv”, “Qanday qilib millionerga turmushga chiqish kerak” kabi filmlarda ishtirok etadi. Ammo haqiqiy mashhurlik unga “Jentlmenlarga mallasochlar yoqadi” lentasi chiqqandan keyingina nasib etdi.
ListChallenges portali reytingining natijalariga ko‘ra, barcha davrlarning eng go‘zal va iqtidorlik aktrisasi Monika Belluchchidir. 59 yoshli yulduz Italiyada tavallud topgan va bolaligidan huquqshunos bo‘lishni orzu qilgan, ammo sohibjamolligi e’tibordan chetda qolmagan Beluchchi 16 yoshidanoq modellik olamiga qadam qo‘ydi. Oxir-oqibat u sudlarda qatnashishdan ko‘ra, xalqaro podiumlarda chiqishni afzal bildi.
1996-yilda Monika Belluchchi kino olamida o‘zining ilk muvaffaqiyatiga erishdi: “Kvartira” filmidagi roli uchun Monika Sezar mukofotiga sazovor bo‘ldi. Aktrisa ikki karra “Oltin globus” hamda “Kumush tasma” mukofotini qo‘lga kiritgan. Belluchchining yana bir omadli roli Juzeppe Tornatorening “Malena” dramasidagi ijrosi bo‘lgan.
Izoh (0)