Maktabgacha va maktab ta’limi vazirligi xalqaro til sertifikati yo‘q o‘qituvchilar bilan tuzilgan mehnat shartnomalarini bekor qilish yuzasidan rasmiy ko‘rsatma bermagan. Bu haqda vazirlikning O‘zbekiston ta’lim va fan xodimlari kasaba uyushmalari respublika kengashiga yo‘llagan javob xatidan ma’lum bo‘ldi.
Iyul oyi oxirlarida O‘zbekiston ta’lim va fan xodimlari kasaba uyushmalari respublika kengashi xalqaro til sertifikati yo‘q o‘qituvchilarni ishdan bo‘shatmaslik bo‘yicha Maktabgacha va maktab ta’limi vazirligiga taqdimnoma kiritgandi.
“Vazirlik tomonidan hududiy boshqarmalar va tizim tashkilotlariga joriy o‘quv yilidan boshlab xorijiy tillarni o‘zlashtirish darajasi bo‘yicha kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lmagan xorijiy tillar o‘qituvchilari bilan tuzilgan mehnat shartnomalarini bekor qilish yuzasidan rasmiy ko‘rsatma berilmagan”, deyiladi vazirlik xatida.
Shuningdek xorijiy til o‘qituvchilari uchun avgust oyida chet tilini bilish darajasini aniqlash uchun qo‘shimcha test sinovlarini tashkil etish chorasi ko‘rilayotgani ma’lum qilingan.
Vazirlik o‘quvchilarga sifatli taʼlim berilishi va til bilish ko‘nikmalarini lozim darajada egallashlari uchun ularga taʼlim beradigan pedagoglarning bilim darajasi (shu bilan birga til bilish darajasining asosi sifatida tegishli sertifikatga ega bo‘lishi) yetarli bo‘lishi lozimligi muhim ahamiyatga egaligini bildirgan. Shu bilan birga, xodim va ish beruvchi yakka tartibdagi mehnatga oid munosabatlar Mehnat kodeksida, boshqa qonunlarda nazarda tutilgan tartibda va shartlar asosida bevosita yakka tartibdagi mehnatga oid munosabatlarning subyektlari o‘rtasida hal etilishi lozimligi keltirilgan.
Izoh (0)