Xitoyning MAD Architects studiyasi Rotterdam portidagi tarixiy omborni rekonstruksiya qilib, uning asosida migratsiya muzeyini barpo etdi. Loyiha Fenix deb nomlanib, Niderlandiyaning yangi diqqatga sazovor joyiga aylandi.
Binoning eng asosiy xususiyati “Tornado” deb nomlangan qurilma bo‘lib, u ikki tomonlama spiral zinapoya shaklida qurilgan, uzunligi 550 metr, 336 pog‘onadan iborat.
Spiral birinchi qavatdan boshlanib, 24 metr balandlikdagi ochiq kuzatuv maydonchasigacha ko‘tariladi. U 297 ta zanglamaydigan po‘lat panellar bilan qoplangan bo‘lib, har bir panelga 100 soatdan ortiq vaqt davomida qo‘lda ishlov berilgan.
Mehmonlar qulayligi uchun minoraga lift ham o‘rnatilgan. Yuqoridan kuzatish mumkin bo‘lgan maydondan Rotterdam shahri va Maas daryosining manzarasi ochiladi. Me’morlar spiralni ko‘tarilayotgan havo oqimlari ramzi va migratsiya harakatlarining metaforasi sifatida tasvirlagan. 16 000 kvadrat metr maydonga ega bo‘lgan muzey ichida global migratsiya tarixiga bag‘ishlangan ko‘rgazmalar tashkil etilgan.
Bino tarixiy ahamiyatga ega, chunki aynan shu port orqali millionlab migrantlar, jumladan Albert Eynshteyn va rassom Villem de Kuning o‘tgan. Markaziy ko‘rgazma “Migrantlar oilasi” deb nomlanib, 55 mamlakatdan 136 nafar fotograf tomonidan olingan 200 ga yaqin suratni o‘z ichiga oladi. Muzeyda “Chamadonlar labirinti” ham tashkil etilgan, u yerda 2000 dan ortiq migrantlar hadya qilgan chamadonlardan iborat buyumlar turli madaniyat vakillarining hikoyalarini o‘zida jamlaydi.
Binoga energiya tejovchi texnologiyalar — issiqlik tizimi va nasoslari o‘rnatilgan, ular isitish va sovitishga bo‘lgan xarajatlarni kamaytiradi. Ombor tomi esa yashil o‘simliklar bilan qoplangan.
Loyiha arxitektura san’atini qo‘llab-quvvatlashga ixtisoslashgan Droom en Daad jamg‘armasi tomonidan moliyalashtirilgan. Tarixiy beton konstruksiyalarni restavratsiya qilish ishlarida Bureau Polderman kompaniyasi hamkorlik qilgan.
Fenix MAD Architects korxonasining yirik loyihalaridan biri bo‘lib, ular orasida One River North va Changchun aeroporti terminali ham bor.
Izoh (0)