Isroil armiyasi Qurbon hayiti arafasida Bayrut janubiy chekkasida joylashgan bir nechta obyektlarga aviazarba berdi. Harbiylarning bayonotiga ko‘ra, hujum nishonida “Hizbulloh” harakati tomonidan dron ishlab chiqarishga mo‘ljallangan yerosti inshootlari bo‘lgan.
Bu yahudiy davlati tomonidan Livan poytaxti yaqiniga bir oydan ortiq vaqt ichida berilgan ilk zarbadir. U, shuningdek, AQSH vositachiligi bilan o‘tgan yilning noyabr oyida tuzilgan o‘t ochishni to‘xtatish bitimidan beri to‘rtinchisi hisoblanadi.
Zarba berilishidan avvalroq Isroil tomoni ogohlantirish e’lon qilib, to‘rt manzildagi sakkizta bino nishonga olinishi haqida xabar qildi.
Isroil o‘t ochishni to‘xtatish kelishuvidan so‘ng ham deyarli har kuni Livan janubi va sharqidagi hududlarga hujumlar uyushtirib kelmoqda. Livan tomoni bu hujumlarni sulhga zid deb hisoblaydi.
Biroq Isroil rasmiylari zarbalardan murod “Hizbulloh” yana kuch yig‘ishining oldini olish ekanini da’vo qiladi. Ularning fikricha, so‘nggi urush paytida “Hizbulloh” o‘z rahbariyati va qurollarining katta qismini yo‘qotgan.
“Hizbulloh Eron terrorchi guruhlari yo‘l-yo‘rig‘i va moliyaviy ko‘magida minglab dronlar ishlab chiqarmoqda”, deyiladi Isroil armiyasi bayonotida.
Biroq “Hizbulloh” na Isroil hujumiga, na unga qarshi yog‘dirilgan ayblovlarga javoban rasmiy bayonot bermadi.
Lekin ismini oshkor etmaslik sharti bilan Al-Arabiya telekanaliga izoh bergan tashkilot rasmiysi nishonga olingan hududda dron ishlab chiqarish inshootlari borligi haqidagi da'volarni inkor qilgan.
“O‘t ochishni to‘xtatish kelishuviga binoan, agar tomonlarda shikoyat bo‘lsa, uni o‘rganish mexanizmi mavjud. Biroq Isroil, xususan, Netanyaxu mintaqadagi urushni davom ettirmoqchi”, degan u.
Mazkur mojaro natijasida 4 000 dan ortiq livanlik halok bo‘lgan, ularning bir necha yuz nafari tinch aholi vakillari edi. Livan hukumati aprel oyida bayonot berib, sulh imzolanganidan beri Isroil zarbalari natijasida yana 190 kishini o‘ldirilgani, shuningdek 485 kishi yaralangani haqida ma’lum qilgan edi.
“Hizbulloh”ga nisbatan, ichki va xalqaro bosimlar ortib bormoqda. Ayniqsa Suriyada Bashar Asad rejimi ag‘darilgach, vaziyat yanada jiddiylashdi. Boisi tashkilot Erondan muhim ta'minot yo‘lini yo‘qotdi.
Livan hukumati uni qurollarini topshirishga da’vat qilmoqda. Biroq tashkilot vakillarining aytishicha, ular Isroil aviazarbalarni to‘xtatib, Livan janubida egallab turgan besh nuqtadan chiqib ketsagina qurollarini topshiradi.
Izoh (0)