So‘nggi to‘rt hafta ichida Germaniya chegarachilari 3 278 nafar migrantni mamlakatga kiritmadi. Bu haqda Deutsche Welle xabar berdi.
Ma’lum bo‘lishicha, 8-maydan boshlab Germaniyada yangi tartib kuchga kirdi. Ushbu tartib boshpana so‘rovlarini chegara punktlarida darhol rad etishga imkon beradi. Biroq umumiy rad etishlarning faqat 160 tasi ichki ishlar vaziri Aleksandr Dobrindt tomonidan tasdiqlangan yangi qoidalarga binoan amalga oshirilgan.
Shu davrda chegarada “zaif guruhlar”ga mansub 46 kishining boshpana so‘rovlari qabul qilingan. Bu guruhga bolalar, homilador ayollar va kasalliklari borlar kiradi. Ular uchun Dobrindt qarori ta’sir qilmaydi.
Noqonuniy migrantlar soni oshmoqda
So‘nggi oylarda Germaniyaga noqonuniy kirib kelgan migrantlar soni o‘smoqda. Aprel oyida 5 079 kishi kirgan bo‘lsa, may oyida bu raqam 10 foizga oshib, 5 571 nafarga yetgan. Bu 2025-yil boshidan buyon eng yuqori ko‘rsatkichdir.
Yil boshidan beri Germaniyaga yashash uchun ruxsati bo‘lmagan jami 25 298 kishi kirib kelgan. Agar shu tendensiya davom etsa, yil oxiriga qadar migrantlarning umumiy soni so‘nggi yillardagi eng yuqori darajaga chiqishi mumkin.
Chegarada boshpana so‘rovlarini rad etish tartibi
May oyida Germaniya ichki ishlar vaziri 2015-yilgacha amal qilgan tartibni qayta tikladi. Ushbu qoidaga ko‘ra, Yevropa Ittifoqi davlatlaridan kelgan boshpana so‘rovchilari chegara punktlarida to‘g‘ridan-to‘g‘ri mamlakatga kiritilmasligi mumkin. Faqat bolalar, homiladorlar kabi “zaif guruhlar” bundan mustasno.
Dobrindt Germaniyaga kirishni rad etishlar soni “bosqichma-bosqich oshishini” va’da qilgan. OAV ma’lumotlariga ko‘ra, chegaralardagi federal politsiya xodimlari soni 11 mingdan 14 mingga ko‘paygan, nazorat punktlari soni ham oshgan. Dastlabki ikki kun ichida chegara punktlarida ushlangan migrantlarning taxminan 80 foizi chiqarib yuborilgan.
Izoh (0)