Yaponiyaning Osaka shahrida o‘tkazilayotgan “EXPO-2025” ko‘rgazmasida suv shoularini namoyish etish va sayoz hovuzdan foydalanish vaqtincha to‘xtatildi. Tashkilotchilar suv namunalarida yuqori miqdorda bakteriyalarni aniqlandi. Bu haqda Al Arabiya xabar berdi.
Ko‘rgazma boshlanganidan beri mehmonlar sayyohlik hududida mayda uchuvchi hasharotlarning ko‘payganidan shikoyat qilgan. Aprel oyida ochilgan “EXPO 2025” doirasida 160 dan ortiq mamlakat, mintaqa va xalqaro tashkilotlarning pavilyonlariga olti million kishi tashrif buyurgan.
Expo ochilishidan oldingi so‘rovnomalar jamoatchilik orasida unga katta qiziqish yo‘qligini ko‘rsatgan edi. Biroq so‘nggi haftalarda tashrif buyuruvchilar soni sezilarli darajada ortgani kuzatilmoqda. Shunga qaramay, ilgari chiqindi poligoni bo‘lgan Osaka ko‘rfazidagi sun’iy orolda joylashgan ko‘rgazma maydonining ekologik holati yuzasidan xavotirlar ortib bormoqda.
Tashkilotchilar 5-iyun kuni legionella bakteriyalari yuqori darajada aniqlangani sababli mehmonlar, jumladan bolalar salqinlanadigan sayoz suv zonasini yopishga majbur bo‘lgan. Shu sababli har kuni o‘tkaziladigan favvora shoulariga ham vaqtincha cheklov kiritilgan.
Hozirda suv havzalarini tozalash ishlari olib borilmoqda. E’tiborlisi, ko‘rgazma boshlanishidan biroz oldinroq ushbu hududda yong‘in xavfini tug‘dirishi mumkin bo‘lgan darajadagi metan gazi aniqlangan. Yaqinda esa mehmonlarni bezovta qilayotgan, chaqmaydigan mayda chivinlarni yo‘qotish uchun tashkilotchilar hududga insektitsid purkagan.
Jahon yarmarkasi nomi bilan tanilgan va bir vaqtlar Parijga Eyfel minorasini olib kelgan Expo fenomeni 1851-yilda Londonda bo‘lib o‘tgan Kristal saroy ko‘rgazmasidan boshlangan. Hozirgi kunda bu tadbir har besh yilda dunyoning turli nuqtalarida tashkil etiladi.
Izoh (0)