Ўзбекистонда таълимга тўйиниш юз бераётгани сабаб олий маълумотли бўлишга қизиқиш камаймоқда. Бу ҳақда Олий таълим, фан ва инновациялар вазири Қўнғиротбой Шарипов “Дарё” мухбирига берган интервьюсида фикр билдирди.
Янги ўқув йили учун давлат олий таълим муассасаларига абитуриентларни рўйхатга олиш якунланди. Қайд этилишича, жами 732 минг 411 нафар талабгор рўйхатдан ўтган. Таққослаш учун, 2020 йилда бу рақам 1 миллион 484 мингдан ортиқ бўлган. Яъни беш йил ичида ОТМларга ҳужжат топширувчилар сони қарийб икки баравар қисқарган. Қўнғиротбой Шарипов бунга муносабат билдириб, мамлакатда олий таълимга тўйиниш рўй бераётганини айтди.
“Биз абитуриентлар сони нега камайганини таҳлил қилдик. Жорий йилги битирувчилар сони 15 мингтага ошган. Ўтган ва ундан олдинги йилларда битирувчилар 177 мингтага кам бўлганди. Олдинги йилларда институтларга кира олмаганлар хусусий, нодавлат олий таълим муассасаларига кириб, таълимга бўлган эҳтиёжини қондирган деб ўйлаяпман. Шунинг ҳисобига абитуриентлар кам. Шу билан бирга, охирги йилларда хусусий университетлар кўпайди. Уларнинг очилиши 2019 йилда бошланган бўлса, ҳозир хусусий университетлар сони 71 тага етди. Улар кўпайгани бозорда олий таълимга кира олмай юрган ёшларимизнинг ҳаммасини қамраб олган. Энди бозор тўйинди демоқчиман. Дипломга қизиқиш камайиб кетаётгани табиий ҳол. Шундай бўлади секин-секин. Ўтган ёки олдинги йиллар давомида кўпчиликда олий таълимга киришга қизиқиш юқори бўлса-да, имконият чекланган эди. Давлат университетларида квота бўларди. Авваллари фақат 70 мингга яқин талаба қабул қилинган бўлса, ўтган йили бу сон 360 мингтага етди. Шунинг ҳисобига йилдан йилга олий таълимга кирадиган, олдинги йилларда ўқишни битирган болалар сони камайяпти”, деди вазирлик раҳбари.
Маълумот учун, мамлакатда 201 та ОТМлари фаолият юритмоқда. Шундан 90 таси Тошкент шаҳрида, қолганлари Қорақалпоғистон Республикаси ва вилоятларда жойлашган.
Изоҳ (0)