Нью Йорк шаҳрида маҳалла институтига бағишлаб ўтказилган форумда халқаро ташкилотлар вакиллари Ўзбекистондаги маҳаллаларнинг ёшлар муаммоларини бевосита ҳал этишдаги саъй-ҳаракатларини юқори баҳолади.
Ўзбекистоннинг БМТдаги доимий ваколатхонаси ҳамда Ўзбекистон Маҳаллалар уюшмаси ҳамкорлигида ташкил этилган форумда БМТга аъзо давлатларнинг доимий вакиллари ва дипломатлари, шунингдек, халқаро ташкилотлар, ОАВ ва фуқаролик жамияти вакиллари иштирок этди.
БМТнинг Ёшлар масалалари бўйича бошқармаси вакили Судха Балакришнан таъкидлаганидек, Ўзбекистонда кейинги йилларда президент Шавкат Мирзиёев бошчилигида амалга оширилаётган ислоҳотлар натижасида маҳаллаларда татбиқ этилаётган рақамли ечимлар ва инклюзив ғоялар халқ ва давлат ўртасидаги ишонч мустаҳкамланишига хизмат қилмоқда.
БМТнинг Аҳолишунослик фонди вакили Лейла Шарафи ўз чиқишида барқарор ривожланиш мақсадларига фақатгина маҳаллий жамоалар фаол иштирок этган тақдирда эришиш мумкинлигини қайд этди. Л.Шарафи Ўзбекистонда 9400 дан ортиқ маҳаллада олиб борилаётган ислоҳотлар ҳақида тўхталар экан, бу жараёнда хотин-қизларнинг ижтимоий-ҳуқуқий саводхонлигини ошириш ва муҳим қарорларни қабул қилишга ёшларни фаол жалб қилиш борасида эришилган ютуқларни эътироф этди.
Зўравонлик экстремизми билан курашиш бўйича Таҳлил маркази директори Жозеф Гайт БМТТД билан ҳамкорликда Ўзбекистон маҳаллаларида ўтказилган тадқиқотлар натижаларини тақдим этди. Тадқиқот натижасига кўра, ўзбекистонликларда оилалардаги зўравонликни қабул қилиш 67 фоизга, гендер тенглик масаласидаги эскича ёндашувлар эса 12 фоизга қисқарган. Бу эса маҳаллалар барқарор ижтимоий ўзгаришлар учун самарали майдон бўлиб хизмат қилаётганини исботлаши қайд этилди.
БМТнинг Ўзбекистондаги доимий координатори Сабине Маҳл ўз чиқишида Қорақалпоғистон Республикаси, Қашқадарё ва Сурхондарё вилоятларига қилган сафари ҳақида сўзлаб берди. У ўз кўзлари билан маҳаллада бандликни таъминлаш, соғлиқни сақлаш ва аёллар ҳуқуқлари масалалари қай тарзда ҳал қилинаётганини кўрганини сўзлаб берди. С.Маҳл маҳаллани “маҳаллий жамоалар қалби”, деб таъкидлаган ҳолда, Ўзбекистон президентига БМТнинг ташаббусларини қўллаб-қувватлагани учун миннатдорлик билдирди.
Форум якунида 2026 йилда БМТ шафелигида маҳалла институти фаолиятига доир II бутунжаҳон конференциясини Самарқанд шаҳрида ўтказиш таклифи илгари сурилди.
Изоҳ (0)