Сурхондарёда картошка ичига яшириб олиб ўтилаётган 154 кг гашиш тўхтатиб қолинди

Сурхондарё вилояти божхона бошқармаси «Айритом» чегара-божхона пости ходимлари ДХХ Чегара қўшинлари ҳарбий хизматчилари билан ҳамкорликда йирик миқдордаги гиёҳвандлик воситасининг навбатдаги яширин айланмасини фош қилди. Бу ҳақда Давлат божхона қўмитаси матбуот хизмати «Дарё»га маълум қилди.

Сурхондарё вилояти божхона бошқармаси «Айритом» чегара-божхона постига қўшни мамлакатдан кириб келган юк автотранспорт воситаси Ўзбекистонда транзит тарзида ҳаракатланиб, Андижон вилоятидаги «Дўстлик» чегара-божхона пости орқали қўшни давлатга чиқиб кетиши керак бўлган. Ҳужжатларга кўра, унга 533 та қопда 22 тоннадан зиёд картошка юкланган.

Ўрнатилган тартибда ушбу транспорт воситаси постдаги инспексион кўрик мажмуаси орқали кўздан кечирилганида, юкларнинг рентген тасвири божхона ходимларини шубҳалантирган.

Натижада, автомашинадаги картошка солинган 533 та қопнинг 38 тасига 1305 дона моҳирлик билан тайёрланган картошка шаклидаги ўрамлар – гиёҳвандлик воситалари жойлангани фош бўлган.

Мазкур ўрамлардаги гашиш гиёҳвандлик воситасининг умумий оғирлиги 154 килограмм 90 граммни ташкил қилган.

Таъкидланишича, қонунбузарлар ҳар бир ўрамга полиэтилен, нусха кўчиришда фойдаланиладиган қора қоғоз ва герметик скотч ёрдамида ишлов берган.Ҳозирда юқоридаги ҳолат юзасидан божхона органлари томонидан жиноят иши қўзғатилган.

Аввалроқ Тошкент вилоятида тожикистонлик шахс салкам 11 кг гашиш гиёҳванд моддаси билан қўлга тушгани, Бухородаги хонадонда Афғонистон фуқаросига тегишли 54 кг гиёҳванд модда кўмиб қўйилгани аниқлангани, Қорақалпоғистон, Самарқанд ва Наманганда гиёҳванд моддаларни мамлакат ҳудудига олиб кирган шахслар қўлга олингани тўғрисида хабар берилганди.