Қорақалпоғистоннинг Тўрткўл туманида адвокат судьяга 10 минг доллар пора бераётганида қўлга олинди. Бу ҳақда Судьялар олий кенгаши матбуот хизмати хабар берди.
Маълум қилинишича, ҳолат Судьялар олий кенгаши томонидан тизимда коррупциянинг олдини олиш ва судьялар дахлсизлигини таъминлаш йўналишида амалга оширилаётган тадбирлар доирасида аниқланган бўлиб, адвокат З.Я. жиноят ишлари бўйича Тўрткўл туман суди иш юритувидаги Жиноят кодексининг 25, 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан айбланаётган К.О.га енгиллик қилиб бериш эвазига судьяга 10 минг доллар миқдорида пора таклиф қилган.
Қорақалпоғистон Республикаси ҳуқуқни муҳофаза қилувчи органлар томонидан 29 февраль куни ўтказилган тадбирда адвокат судьяга пора бераётганда қўлга олинган.
Айни пайтда адвокатга нисбатан Жиноят кодексининг тегишли моддалари билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)