Давлат хавфсизлик хизмати томонидан Самарқанд ва Тошкент вилоятлари божхона ва ички ишлар бошқармалари билан ҳамкорликда ўтказилган тадбирда 4 килодан ортиқ наркотик моддаларнинг айланма савдосига чек қўйилди. Бу ҳақда ЎзА хабар берди.
Самарқандда ўтказилган тадбирда Самарқанд–Қорақалпоғистон йўналишида ҳаракатланиб кетаётган Cobalt салонида 992 грамм «опий» моддаси борлиги аниқланган. Мазкур наркотик моддани тўрткўллик харидорларга сотган самарқандлик фуқаролардан бирининг хонадонидан 767 грамм «гашиш» моддаси процессуал тартибда расмийлаштириб олинган.
Бошқа бир ҳолатда, Ургут туманида ҳаракатланаётган Matiz тўхтатилиб, кўздан кечирилганда, ундаги йўловчининг ёнида 500 грамм «опий» моддаси борлиги аниқланган. Булунғур туманида ўтказилган тадбирда эса Самарқанд—Наманган йўналишида ҳаракатланаётган Cobalt’да йўловчи сифатида кетаётган шахсёнида 978 грамм «гашиш» моддаси топилган.
Тошкент вилоятида ўтказган тадбирда Андижон вилояти Пахтаобод туманида яшовчи шахс бошқарувидаги Cobalt мотор қисмига яшириб қўйилган 951 грамм «гашиш» гиёҳвандлик воситаси процессуал тартибда расмийлаштириб олинган.
Аниқланишича, ушбу гиёҳвандлик воситалари Ўзбекистонга учинчи шахслар томонидан Қирғизистон ва Тожикистондан контрабанда йўли билан олиб келинган.
Мазкур ҳолатлар юзасидан фуқароларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Мавзуга доир:
Изоҳ (0)