Ўзбекистонда Тожикистондан келтирган гиёҳванд моддаларни сотиш билан шуғулланган шахслар қўлга олинди

Қорақалпоғистон Республикасининг Тўрткўл туманида гиёҳвандлик воситасини 90 минг долларга сотмоқчи бўлган шахс қўлга олинди.

Маълум қилинишича, Давлат хавфсизлик хизматининг Қорақалпоғистон Республикаси бўйича бошқармаси ходимлари томонидан тезкор тадбир ўтказилган. Тадбирда Тўрткўл туманида яшовчи 34 ёшли шахс Самарқанд шаҳридан Нукус шаҳрига 2 килограмм 10 грамм героин моддасини олиб келиб, харидорга 90 минг долларга сотаётган вақтида қўлга олинган. Аниқланишича, мазкур гиёҳвандлик воситаси тожикистонлик наркокурьер томонидан Ўзбекистон ҳудудига ўтказилган.

Шунингдек, ДХХ Тошкент шаҳар бўйича бошқармаси ходимлари ҳам божхона ва ички ишлар органлари билан ҳамкорликда бир нечта тезкор тадбирлар ўтказган. Жумладан, Учтепа туманида яшовчи, муқаддам гиёҳвандлик воситалари билан боғлиқ жиноят содир этгани учун судланган 58 ёшли шахснинг яшаш хонадони белгиланган тартибда кўздан кечирилган. Текширув давомида уйнинг шифт қисмига яшириб қўйилган 1,924 килограмм опий моддаси борлиги аниқланиб, процессуал тартибда расмийлаштириб олинган.

Таъкидланишича, мазкур гиёҳвандлик воситаси ҳам учинчи шахслар томонидан Тожикистондан келтирилган. Шунингдек, хонадонда тегишли ҳужжатлари бўлмаган 1 дона пневматик пистолет ҳам борлиги маълум бўлган.

Учтепа туманида кузатилган бошқа бир ҳолатда Тожикистондан айланма йўллар билан ўтказилган наркотик моддаларни Тошкент шаҳрига олиб келиб сотиш билан шуғулланган, Сурхондарё вилоятида туғилган 3 нафар шахснинг ноқонуний фаолиятига чек қўйилиб, улардан 943 грамм гашиш моддаси процессуал тартибда расмийлаштириб олинган.

Бундан ташқари, Қирғизистондан ноқонуний йўллар билан Ўзбекистон ҳудудига ўтказилган наркотик моддалар ва кучли таъсир қилувчи дори воситалари ҳам аниқланган. Хусусан, Фарғона туманида яшовчи икки фуқаро (1976 ва 1997 йилларда туғилган) келаётган Lacetti русумли автотранспорт воситаси Тошкент шаҳрига кираверишдаги «Шарқ» ЙПХ масканида тўхтатилган. Машина кўздан кечирилганда салонида 939 грамм гашиш моддаси борлиги аниқланган ҳамда тегишли тартибда расмийлаштириб олинган.

ДХХ ходимлари томонидан Божхона қўмитасининг Тошкент шаҳар бошқармаси билан ҳамкорликда ўтказилган тезкор тадбирда Тошкент шаҳрида яшовчи икки фуқаро (1977 ва 1995 йилларда туғилган) Чилонзор туманида харидорга 560 дона «Регапен» ҳамда 100 дона «Тропикамид» кучли таъсир қилувчи дори воситаларини 26 миллион сўмга сотаётган вақтларида қўлга олинган.

Шунингдек, уларнинг шериги 20 ёшли шахс ҳам ушланиб, унинг вақтинча яшаш хонадонидан 1540 дона «Регапен», 630 дона «Тропикамид» ҳамда 30 дона «Селофен» кучли таъсир қилувчи дори воситалари ўрнатилган тартибда олиб қўйилган.

Фарғона вилоятида ўтказилган тезкор тадбирда Фарғона—Наманган йўналишида ҳаракатланаётган 32 ёшли шахс бошқарувидаги автомашина Ёзёвон тумани ҳудудида тўхтатилиб, кўздан кечирилган. Натижада, унинг салон қисмида Ўзбекистонда муомаласи чекланган наркотик моддалар туркумига кирувчи 1920 дона «Трамадол» дори воситаси, шунингдек, дорихоналарда шифокор рецепти асосида сотилиши лозим бўлган 4704 дона «Регапен» ва 150 дона «Тропикамид» кучли таъсир қилувчи дори воситалари борлиги аниқланган.

Яна бир ҳолатда Қувасой—Тошкент йўналишида ҳаракатланаётган автомашина «Наманган» ЙПХ масканида тўхтатилиб кўздан кечирилганда, унда Қувасой шаҳрида яшовчи 25 ёшли шахсга тегишли 840 дона «Регапен» ва 240 дона «Тропикамид» кучли таъсир қилувчи дори воситалари борлиги маълум бўлган ҳамда процессуал тартибда олиб қўйилган.

Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Аввалроқ Фарғонада томорқасида 100 туп кўкнори етиштираётган шахс аниқлангани, Тошкент шаҳри ва вилоятида кучли таъсир қилувчи дорилар савдоси билан шуғулланган 9 киши ушлангани тўғрисида хабар берилганди.