Фарғона вилояти Олтиариқ шаҳарчасидаги Давлат кадастрлар палатасининг Олтиариқ тумани филиали раҳбари ҳамда унинг шериги 1 000 АҚШ долларига фуқаронинг кадастр ҳужжатларини расмийлаштириб беришни ваъда қилгани аниқланди. Бу ҳақда “Замон” информацион дастурида маълум қилинди.
Қайд этилишича, Олтиариқ туманида яшовчи фуқаро ер сотиб олиб, уй қурган. Уйнинг кадастр ҳужжатларини расмийлаштиришга келганда эса мазкур жой тақиқда экани, бу ерга турар жой қуриб бўлмаслиги маълум бўлган. Шундан сўнг, ушбу фуқаро Фарғона вилояти ИИБ бошлиғи номига ариза билан мурожаат қилган.
Тумандаги “Жарқўрғон” МФЙ ҳудудидаги 656-контурда жойлашган иссиқхона майдонидан фуқаро 10 сотих қисмини 11 минг долларга сотиб олган. Мазкур жой тақиқда эканини билиб, унга ечим топмоқчи бўлиб юрганида ерни ўзига сотган шахсга дуч келган. У Давлат кадастрлар палатасида ишловчи раҳбар танишлари орқали муаммони ҳал қилиб, кадастр ҳужжатларини расмийлаштириб бериш учун фуқародан 1 000 АҚШ доллари талаб қилган.
Аризага асосан шу куни вилоят ИИБ, ДХХ ҳамда департамент ходимлари ҳамкорлигида тезкор тадбир ўтказилган. Тадбирда Олтиариқ шаҳарчасидаги Давлат кадастрлар палатасининг Олтиариқ туман филиали раҳбари ҳамда унинг жиноий шериги (юқоридаги шахс) аризачидан пулларни пора тариқасида олган вақтида ушланган.
Шунингдек, филиал раҳбарининг хизмат хонаси ҳамда автомашинаси кўздан кечирилганида, машина салонидан икки дона гугурт қутиси ичидан наша гиёҳвандлик моддаси топилган. Ҳозирда ҳолат юзасидан терговга қадар текширув ҳаракатлари олиб борилмоқда.
Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилган эди.
Изоҳ (0)