Ўзбекистонда 2025 йил ёзнинг ўртаси сўнгги йилларда тез-тез қайд этилганидек, июль ойи ўртача йиллик қийматлардан 1-2 даражага илиқроқ бўлиши кутилмоқда.
Прогнозларга кўра, июль ой ҳаво ҳарорати кўтарилиши билан бошланади. 2 июль куни республика шимолида, жанубида ва чўл ҳудудларида, 3—5 июль кунлари ҳудуднинг катта қисмида ҳаво ҳарорати 40-43 даражагача, жанубда ва чўл ҳудудларда баъзи жойларда 44-46 даражагача кўтарилади.
5 июль куни республиканинг ғарбий ярими бўйича, 5 июлда барча ҳудудлар бўйича ҳарорат 4-6 даражага пасаяди. Бироқ июль ойида салқин ҳавони кутмаслик керак.
Ой охиригача ҳарорат асосан 36-39 даража, айрим энг иссиқ кунларда эса 40-41 даражагача, жанубда ва чўл ҳудудларда 42-43 даражагача бўлиши кутилмоқда.
Июль ойида ёғингарчилик бўлиши эҳтимоли кам.
Ўзбекистонда июль ойи одатда қандай кечган?
Мамлакатда энг юқори ҳаво ҳарорати июль ойида кузатилади. Июль ойининг ўртача максимал ҳарорати (ёки иқлим меъёри) республика ҳудудининг катта қисмида 35-37 даражани, жанубда ва чўл ҳудудларда 38-40 даражани ташкил этади.
Аммо деярли ҳар йили, июль ойида ҳаво ҳарорати 40-42 даражагача, шимолда, жанубда ва чўл ҳудудларда 43-45 даражагача, энг иссиқ йилларда эса ундан ҳам юқори бўладиган жуда иссиқ даврлар кузатилади.
Ҳаво ҳарорати 40 даража ва ундан юқори бўлган ўртача кунлар сони республиканинг марказий ва шарқий ҳудудларда 1-3 кун, шимолий ва жануби-ғарбий ҳудудларда 3-7 кун, чўл ҳудудларда ва жанубда 10-15 кунни ташкил этади.
Сўнгги йилларда бундай иссиқ кунлар сонининг кўпайиш тенденцияси кузатилмоқда. Охирги 10 йил ичида (2015—2024 йиллар) 7 та июль ойлари метеорологик кузатувлар тарихидаги энг иссиқ ўнталикка кирди. Бу даврнинг қолган июль ойлари меъёр атрофида ёки ундан бир оз илиқроқ бўлган.
Республика ҳудудининг катта қисмида метеорологик кузатувларнинг барча йиллари учун 2019 йил июль ойи энг иссиқ бўлди. Масалан, ушбу йили Тошкентда кетма-кет 14 кун (меъёр 3 кун) давомида максимал ҳаво ҳарорати 40 даражадан юқори бўлган, энг иссиқ кунларда эса 42-43 даражага етган.
Июль ойи Ўзбекистоннинг шимолий ҳудудларида 2018 йил, жанубда эса 2021 йил энг иссиқ июль ойи бўлган. Ўша июль ойида максимал ҳаво ҳарорати 41-43 даражага, шимолда, жанубда ва чўл ҳудудларда 44-45 даражага етган. Қорақалпоғистон Республикаси, Хоразм ва Навоий вилоятларида баъзи жойларда ҳаво ҳароратининг тарихий максимуми 46-48 даража қайд этилган.
Июль ойида жуда кам ёмғир ёғади, чунки бу йилнинг энг қуруқ ойларидан бири деб ҳисобланади.
Изоҳ (0)