Самарқандда ҳуқуқ-тартибот идоралари билан ҳамкорликда ўтказилган тадбирлар давомида 1,2 килограмм гиёҳванд моддалар, 312 дона психотроп дори воситалари савдосига чек қўйилди. Бу ҳақда «Дарё»га ДХХ Самарқанд вилоят бошқармаси маълум қилди.
Хусусан, Ургут туманида яшовчи С.З.нинг яшаш манзилини кўздан кечириш давомида 715 грамм опий гиёҳвандлик моддаси борлиги аниқланган.
Самарқанд—Тошкент йўналиши бўйича ҳаракатланиб кетаётган Spark автомобили ҳайдовчиси, Хоразм вилояти Хазорасп туманида яшовчи Х.Ў.нинг ёнида 2,83 грамм опий ва 0,08 грамм героин топилган.
Яна бир тадбирда К.С., М.И. ва Н.Б. исмли фуқаролар 0,5 килограмм марихуана гиёҳвандлик моддасини Ургут тумани «Сариқтепа» маҳалласи ҳудудида маҳаллий фуқарога 1700 долларга сотаётган вақтда қўлга олинган.
Бундан ташқари, Булунғур туманида яшовчи фуқаролар А.У. ва Т.Ж. Тошкент—Самарқанд йўналиши бўйлаб ҳаракатланиб кетаётган Cobalt русумли автомашинада 200 дона «Зардекс» ва 112 дона «Регопен» психотроп дори воситалари борлигини аниқлаган.
Аниқланган ҳолатлар бўйича ҳуқуқбузарларнинг ҳаракати процессуал тартибда расмийлаштирилган. Барча ҳолатлар бўйича Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ Тошкент вилоятида тожикистонлик шахс салкам 11 кг гашиш гиёҳванд моддаси билан қўлга тушгани, Бухородаги хонадонда Афғонистон фуқаросига тегишли 54 кг гиёҳванд модда кўмиб қўйилгани аниқлангани, Қорақалпоғистон, Самарқанд ва Наманганда гиёҳванд моддаларни мамлакат ҳудудига олиб кирган шахслар қўлга олингани тўғрисида хабар берилганди.
Изоҳ (0)