Қорақалпоғистоннинг Элликқалъа туманида қарийб 75 млрд сўмлик туризм зонаси қурилади. Бу ҳақда Жўқорғи Кенгес матбуот хизмати хабар берди.
Келтирилишича, Элликқалъа туманида Зарбдор тажрибаси бўйича Оқчакўл бўйида умумий 73,4 млрд сўм маблағ асосида туризм рекреацион зонасини ташкил этиш лойиҳаси амалга оширилмоқда.
Лойиҳа доирасида кўл бўйига тўлиқ инфратузилма билан таъминлаш орқали 3 та меҳмонхона, 18 та меҳмон уйи, 20 та ўтов, 2 та ресторан каби туризм ва хизмат кўрсатиш объектлари жойлаштирилади. Лойиҳа ишга тушиши билан 75 иш ўрни яратилиши белгиланган.
Ўзбекистонда 2025 йилдан бошлаб ҳар йили ноябрь ойида “Энг намунали яшил туризм объекти” танлови ўтказилади.
“Туризм объектлари ҳамда жойлаштириш воситаларида атроф-муҳитга салбий таъсири камайтирилган маҳсулотлардан фойдаланиш ва экологик талабларга мувофиқ кўрсатиладиган хизматларни рағбатлантириш чора-тадбирлари тўғрисида”ги қарорга кўра, танловни ўтказишнинг асосий мақсадлари:
- экология ва атроф-муҳитни муҳофаза қилиш ҳамда унинг чиқиндилар билан ифлослантиришининг олдини олиш;
- туризм объектларида пластик маҳсулотлардан фойдаланишни ҳамда пластик чиқиндиларни камайтириш;
- туризм объектларида бир марталик пластиклардан экологик жиҳатдан зарарсиз (биопарчаланувчи) маҳсулотларга ўтиш ва улардан фойдаланишни рағбатлантириш;
- экологик талаблар ҳамда техник жиҳатдан тартибга солиш соҳасидаги экологик мезонларга риоя этилишига эришиш;
- туризм объектларида экология, атроф-муҳитни муҳофаза қилишга қаратилган инновацион ечимлар ҳамда истиқболли ташаббусларни қўллаб-қувватлаш.
Шунингдек, Қорақалпоғистонда қишлоқ хўжалиги, саноат ва туризмни ривожлантириш бўйича лойиҳа офиси ташкил этилиши хабар қилинганди.
Изоҳ (0)