Бухоро ҳамда Қорақалпоғистонда пора олмаган Ички ишлар органлари ходимлари тақдирланди. Бу ҳақда ИИБ матбуот хизматлари хабар қилди.
Маълум қилинишича, иш юритувидаги жиноят иши бўйича 500 АҚШ доллар пора таклиф қилаётган фуқаро ҳақида белгиланган тартибда хабар берган Бухоро вилояти Ички ишлар бошқармаси ҳузуридаги Тергов бошқармаси ходими 10 000 000 (ўн миллион) сўм пул мукофоти билан рағбатлантирилган.
Бундан ташқари, Қорақалпоғистон Ички ишлар вазирлиги ҳузуридаги Тергов бошқармаси иш юритувида бўлган фуқаро С.Х.га нисбатан Жиноят кодексининг 276-моддаси 2-қисми «а» банди (гиёҳвандлик воситасини сақлаш) билан қўзғатилган жиноят иши бўйича, фуқаро С.Х. Тергов бошқармаси бошлиғи ўринбосари подполковник А.Утемуратовга бир неча маротаба, ўзига нисбатан қўзғатилган жиноят ишини судга юбормаслик эвазига 5 000 АҚШ доллари миқдоридаги пулларни пора тариқасида таклиф қилган.
Подполковник А.Утемуратов Қорақалпоғистон ИИВ раҳбариятига билдирги билан мурожаат қилиб, ўз билдиргисида, фуқаро С.Х.га пора бериш жиноят экани, жиноий жавобгарликка тортилиши ҳақида бир нечта марта тушунтириб, огоҳлантиришига қарамасдан, пора таклиф қилиб келаётганини билдириб, унга нисбатан қонуний чора кўришни сўраган.
Ушбу билдиргига асосан, ўтказилган тезкор тадбирда фуқаро С.Х. таклиф қилган 5 000 АҚШ доллар пулларни подполковник А.Утемуратовга берган вақтида, тадбир иштирокчилари томонидан қўлга олиниб, ашёвий далиллар тегишли тартибда ҳужжатлаштирилиб олинган ҳамда Ўзбекистон Бош прокуратураси Иқтисодий жиноятларга қарши курашиш департаменти Қорақалпоғистон бошқармаси томонидан фуқаро С.Х.га нисбатан Жиноят кодексининг 211-моддаси 1-қисми (пора бериш) билан жиноят иши қўзғатилиб, дастлабки тергов ҳаракатларига киришилган.
2021 йилнинг 22 май куни Қорақалпоғистон Ички ишлар вазирлигида Ички ишлар вазири полковник А.Темирханов томонидан касбига содиқ бўлиб, таклиф қилган порани олмаган подполковник А.Утемуратовга пул мукофоти унинг яқин қариндошига вазирлик раҳбариятининг ташаккурномаси ва қиммат баҳо совғалар тантанали равишда топширилди.
Подполковникка мукофот тариқасида қанча пул берилгани маълум қилинмаган.
Бундан аввал Самарқандда 2 минг доллар пора олмаган ИИБ ходимига 15 млн сўм мукофот пули берилгани ҳамда Тошкент вилоятида 1000 доллар порани олмаган кадастр ходимига 10 млн сўм пул ва сиҳатгоҳга 2 кишилик йўлланма берилгани ҳақида хабар берилганди.
Изоҳ (0)