Қорақалпоғистон Республикаси божхона бошқармаси томонидан “Довут-ота” чегара божхона постида соф оғирлиги 18 кг дан зиёд синтетик гиёҳвандлик моддасини олиб киришга уриниш фош қилинди. Бу ҳақда Божхона қўмитаси матбуот хизмати хабар берди.
Маълум қилинишича, республикага кириб келган Lada Largus русумли автотранспорт воситаси белгиланган тартибда божхона кўригидан ўтказилган.
Кўрик давомида автотранспорт юкхонасидаги 2 дона овоз кучайтиргич божхона ходимларининг диққатини тортди. Холислар иштирокида ушбу колонкалар очиб кўрилганида, уларнинг ичида 36 дона полиэтилен ўрамлар моҳирлик билан яширилганлиги фош бўлди.
Ўрамлардаги оқ рангли, ўткир ҳидли, кукунсимон моддалар эса Марказий божхона лабораториясининг хулосасига кўра 18 кг 97 гр оғирликдаги “мефедрон” синтетик гиёҳвандлик моддаси бўлиб чиқди.
Ҳозирда ҳолат юзасидан божхона органлари томонидан жиноят иши қўзғатилди.
Изоҳ (0)