Қорақалпоғистонда муқаддам судланган фуқаро гугурт қутиси ичидаги героинни сотаётганда ушланди

Қорақалпоғистон божхона бошқармаси ходимлари томонидан героин гиёҳвандлик моддасининг ноқонуний айланмада бўлиши ҳолати фош этилди.

Хабар қилинишича, Тўрткўл туманида ўтказилган тезкор тадбир давомида фуқаро Т.С. шартли харидорга 1 дона «Спички» ёзувли гугурт қутисига солинган, 4 дона ўрамда, сарғиш рангли, ўткир ҳидли кукунсимон моддани олдиндан келишилган 200 долларга сотган вақтида тадбир иштирокчилари томонидан тўхтатиб қолинган.

Шундан сўнг ушбу фуқаро холислар иштирокида шахсий кўрикдан ўтказилганида устидаги кўк рангли шимининг ўнг чўнтагида 1 дона ўрамда 0,15 грамм сарғиш рангли, ўткир ҳидли кукунсимон модда борлиги аниқланди. Мазкур фуқаро бошқарувида бўлган «Niva» автотранспорт воситаси кўздан кечирилганида эса салон ичида 1 дона ўрамда 0,58 грамм сарғиш рангли, ўткир ҳидли кукунсимон модда топилди.

Тезкор тадбир давом эттирилиб, фуқаронинг Тўрткўл туманидаги яшаш хонадони кўздан кечирилганида уй хоналаридан биридаги контрамарка печининг устида 1 дона шаффоф целлофан пакетга солинган 3,49 грамм сарғиш рангли, ўткир ҳидли кукунсимон модда борлиги аниқланди.

Тегишли экспертиза хулосасига кўра, фуқародан ашёвий далил сифатида олинган моддалар героин деб номланиши ҳамда унинг соф оғирлиги 4,82 граммга тенг экани тасдиқланди.

Ушбу фуқаро Жиноят кодексининг тегишли моддаси билан муқаддам ҳам судланган. Мазкур ҳолат юзасидан божхона органлари томонидан терговга қадар суриштирув ҳаракатлари олиб борилмоқда.