АҚШ разведкаси Эроннинг ядровий қурол яратиш устида ишлаётганига доир далилларни топмади. Бу ҳақда Сенатнинг разведка бўйича махсус қўмитаси раис ўринбосари Марк Уорнер хабар берди.
Сенаторнинг эслатишича, март ойида АҚШ Миллий разведка директори Тулси Габбард “Эрон бомба яратиш бўйича ҳеч қандай ҳаракат қилмагани” ҳақида баёнот берган.
Шу ҳафтанинг душанба кунида разведка маълумотлари ўзгармаганини тасдиқловчи хабар олдик. Твитлар орқали ташқи сиёсат юритиш — ақлсизлик. Лекин бу одам айнан шундай қиляпти, дея сенатор президент Трампга ишора қилди.
У ҳозирда АҚШнинг мазкур вазият бўйича сиёсати қандай эканидан мутлақо бехабар эканини таъкидлади.
Мен Разведка қўмитаси раиси ўринбосариман, агар менда ҳеч қандай тасаввур бўлмаса, Америка халқи нималарни билади?, деди Марк Уорнер.
Трампни унинг қарашларига тескари фикрлар ташвишлантирмайди
АҚШ президенти Дональд Трамп журналистлар саволларига жавоб берар экан, Эрон ядро қуролини қўлга киритишига “бир неча ҳафта” қолганини айтди. Мазкур прогноз разведка маълумотларига зид келади. АҚШнинг яна бир урушга аралашиши эҳтимоли ҳақидаги саволга жавоб берар экан, Трамп ўзининг аввалги фикрини ҳам такрорлади:
Мен ҳам аралашишни истамайман, лекин мен 20 йилдан бери, балки ундан ҳам кўпроқ вақтдан буён Эронда ядро қуроли бўлмаслиги кераклигини айтиб келаман, деди у.
АBC телеканали ва The Wall Street Journal газетаси манбаларига кўра, АҚШ президенти унга тақдим этилган Эронга зарба бериш режаларини маъқуллаган, бироқ Теҳрон билан ядро дастурини тўхтатиш бўйича музокаралар учун якуний буйруқ бермаган. Ўз навбатида, Эрон ҳукумати ядро қуролини қўлга киритиш нияти ҳақидаги айбловларни рад этишни давом эттирмоқда.
МАГАТЭ ҳам Эрон ядровий қурол яратишга уринмаганини таъкидлади
Халқаро атом энергияси агентлиги (МАГАТЭ) ўз маълумотларига асосланиб, Эрон ядро қуролини ишлаб чиқишга уринмаган, деб ҳисоблайди. Бу ҳақда агентлик бош директори Рафаэл Гросси маълум қилди.
Унинг таъкидлашича, ҳеч бир давлат Эрон каби уранни 60 фоизгача бойитмаяпти. Бу эса техник жиҳатдан ядро қуроли ишлаб чиқариш учун зарур бўлган даражага (90 фоизга) яқин. МАГАТЭ раҳбари Эроннинг кўплаб юқори лавозимли амалдорлари у билан суҳбатларда ядро қуроли яратиш исломга зид эканини тан олганини айтди. Бироқ Эрон бу қуролни яратиш учун зарур бўлган “пазл бўлаклари”нинг барчасига эга.
Изоҳ (0)