АҚШ ҳарбий-ҳаво кучларининг “Қиёмат куни самолёти” сифатида танилган Boeing E-4B Nightwatch борти Яқин Шарқдаги кескинлик фонида бошқа авиабазага парвоз қилди. Бу ҳақда Daily Mail хабар берди.
Маълум қилинишича, учоқ Божер Сити шаҳридан (Луизиана штати) ҳавога кўтарилган. У қирғоқ бўйлаб учиб, Виржиния ва Шимолий Каролина чегараси атрофида ҳалқа ясаган. Шундан кейин эса Мериленд штатидаги Эндрюс авиабазасига қўнган.
Самолёт АҚШ президенти ва мамлакат олий раҳбарияти учун ядровий можаро ҳолатида ҳаводаги қўмондонлик пункти ҳисобланади. У одатда Луизиана штатидаги Барксдейл ҳарбий базасида жойлашган. Учоқнинг ҳавога кўтарилиши ва Эндрюс авиабазасига етиб келишининг аниқ сабаби номаълум. Бу Эрон-Исроил можаросининг кескинлашуви туфайли хавфсизлик чоралари кучайтирилгани билан боғлиқ бўлиши мумкин.
Уч қаватли E-4B Nightwatch 112 кишини сиғдира олади. Ўрта палуба “қўмондонлик маркази” бўлиб, ундан президент ва бошқа юқори мартабали амалдорлар ядро қуролидан фойдаланиш эҳтимоли юзага келган тақдирда, АҚШ ҳаракатларини мувофиқлаштириш учун ўтириши мумкин, деб ёзди Newsweek. Бу ерда қўмондонлик зонаси, конференция зали, брифинг зали, алоқа зонаси ва дам олиш маскани мавжуд.
Самолёт тўртта двигателга эга, унга ҳавода туриб ёнилғи қуйиш мумкин, лайнер парвозда бир неча кун (ёнилғи қуймасдан — 12 соат) туришга қодир. BI маълумотларига кўра, E-4B парвози соатига қарийб 160 000 долларга тушади.
Изоҳ (0)