Эрон 3 минг километрга уча оладиган ядро ракеталарини яширинча ишлаб чиқмоқда. У Шимолий Корея томонидан берилган лойиҳаларга асосланади. Бу ҳақда The Telegraph хабар берди.
Қувғиндаги мухолифат гуруҳининг маълумотларига кўра, иккита объект ядровий каллаклар ишлаб чиқаришни жадаллаштириш учун ишлатилган. Ҳозирда бу объектлар Эроннинг ядро қуроли билан шуғулланувчи Илғор мудофаа тадқиқотлари ташкилоти назорати остида.
“Эрон муллалари ёлғон, алдов ва ҳийлага уста. Йигирма йилдан ортиқ вақт давомида улар музокаралар ва Ғарбнинг мурувватидан фойдаланиб, ўз ядро дастурларини ривожлантириш воситаси сифатида ишлатди, бу билан жаҳон тинчлиги ва барқарорлигига таҳдид солди.
Теҳрон ҳеч қачон ҳозиргидай заиф ва ҳимоясиз бўлмаган. Шу боис, умидсизликка тушган Эрон режими ядро қуролларини ишлаб чиқишни тезлаштирмоқда. Энди уни ички қотиллик, минтақавий уруш қўзғаш ва ядро қуролларини ишлаб чиқариш учун жавобгарликка тортиш вақти келди”, дейди АҚШдаги Эрон Миллий қаршилик кенгаши вакили Сунна Самсами.
Шаҳруд ракета майдончаси сифатида танилган биринчи объектда, худди шу номдаги шаҳардан тахминан 35 километр узоқликда, мутахассислар 3000 км масофага уча оладиган қаттиқ ёнилғили Ghaem-100 ракетасига ўрнатиш мумкин бўлган ядро қуролини ишлаб чиқариш устида иш олиб бормоқда.
Ушбу диапазондаги ракеталар Эронга ўз ҳудудидан Европанинг ичкарисига — Теҳроннинг ашаддий душмани бўлган Исроил каби минтақавий нишонларга ядровий зарбалар беришга имкон беради. Ракетанинг камида учта муваффақиятли синови ўтказилган.
Яқин ойларда янада илғор Ghaem-105 ракеталарини синовдан ўтказиш режалаштирилган.
Аввалги синовлар сунъий йўлдошларни учириш сифатида ўтказилган, чунки ракеталар Эрон ядровий ракета дастурини яшириш учун сунъий йўлдош ташувчилари деб таърифланган, дейилади хабарда.
Сунъий йўлдош тасвирлари кўрсатишича, катта бетон майдончадаги мобил учириш мосламалари ракеталар учун фойдаланилиши мумкин. Унинг яқин атрофида тадқиқот ишлари олиб борилаётгани тахмин қилинмоқда.
Семнан шаҳридан тахминан 70 км жануби-шарқда жойлашган иккинчи объект Шимолий Корея дизайнига асосланган Semurgъ ракеталарини ишлаб чиқиш учун ишлатилади.
Дизайн Шимолий Кореянинг 18 метр баландликдаги УНҲА-1 ракетасига ўхшайди, Пхеньяннинг таъкидлашича, бу асбоб-ускуналарни коинотга ташиш учун фойдаланиладиган ракетадир.
“Семнан ракета полигонининг ҳарбий мақсадини яшириш учун Эрон уни Имом Хоманаий объекти деб атади ва сунъий йўлдош парвозлари ниқоби остида баллистик ракеталарни синовдан ўтказди”, дейилади хабарда.
Эрон 2005 йилдан буён бу объектни мунтазам кенгайтириб келмоқда, сўнгги ўн йил ичида сунъий йўлдош тасвирларида олтита янги объектлар пайдо бўлди.
2009 йилги тасвирларда Семнан полигонининг шимоли-шарқий бурчагидаги катта майдоннинг қазилаётгани кўрсатилган. Ишлар давом этгани сайин, чуқурликда бетон пойдеворлар қурилаётгани кўзга ташланади. Полигоннинг айнан шу қисмининг 2012 йилги тасвирлари иншоотнинг бутунлай тупроқ билан қопланганини кўрсатади.
Изоҳ (0)