Агар Эрон ядровий қурол ишлаб чиқса, Саудия Арабистони ҳам “куч мувозанатини сақлаш учун хавфсизлик нуқтаи назаридан” шундай қадам ташлаши керак, деди қироллик валиаҳд шаҳзодаси Муҳаммад бин Салмон Fox News телеканалига берган интервьюсида.
“Ҳар қандай давлатнинг ядро қуролидан фойдаланиши унинг бутун дунё билан уруш ҳолатида эканини англатади. Дунёга бошқа Хиросима керак эмас. Агар дунё 100 000 киши ҳалок бўлганини кўрса, бу сизнинг бутун дунё билан урушаётганингизни англатади”, — деди шаҳзода.
У Саудия бундай қуролларга интилмаслигини, бироқ “Эроннинг ядровий дастури бошқа танлов қолдирмаётганини” таъкидлади.
Маълумот учун, Саудия Арабистони дастлаб Ядро қуролини тарқатмаслик тўғрисидаги шартномага қўшилган; расмийлар минтақанинг ядросиз мақомини ёқлаб чиққан, аммо 2011 йилда улар ўз позицияларини ўзгартирди ва агар қўшни давлатлар ядровий қуролга эга бўлса, худди шундай чораларни кўришга мажбур бўлишини таъкидлади.
Шаҳзода аввал ҳам мамлакат ядровий бомба яратишга тайёрланиши ҳақида огоҳлантирган, хусусан, 2018 йилда у қироллик бу борада Эрондан “ўрнак олаётганини” таъкидлаган эди.
Саудия Арабистони расмийлари яқин келажакда Эрон билан уруш бошланиши мумкинлигини истисно қилмаяпти. 2018 йилда валиаҳд дунёнинг бошқа давлатларини иқтисодий ва сиёсий босим учун Эронга қарши санкциялар жорий этишга чақирганди.
“Агар ишимизнинг уддасидан чиқмасак, 10-15 йилдан кейин Эрон билан уруш қилишимиз мумкин”, — деган Муҳаммад бин Салмон.
АҚШ ҳисоб-китобларига кўра, Эрон ҳукумати ядровий қурол яратишга қарор қилса, бу бир неча ой ичида амалга оширилиши мумкин, махсус ёқилғи яратишга эса 12 кун кетади. Оқ уйнинг фикрича, Эронга “ҳеч қандай шароитда” бунга рухсат берилмаслиги керак. Агар Теҳрон ядровий қуролга эга бўлса, Исроил “ҳаракат эркинлигини” олади, деди АҚШ расмийлари.
Эрон расмийлари ядровий қурол бўйича режалар йўқлигини таъкидлаб, хорижий давлатлар даъволарни ёлғон деб атамоқда. МАГАТЭ Эрон ядро қуроли ишлаб чиқариш билан шуғулланаётгани ҳақида ҳеч қандай далил йўқлигини билдирган.
Изоҳ (0)