Ғазо ёрдам марказида 18 июнь куни Исроилнинг ҳужуми оқибатида 11 киши ҳалок бўлди. Бу ҳақда BBC хабар берди.
ҲАМАС томонидан бошқариладиган фуқаролик мудофааси агентлиги вакилининг айтишича, Исроил кучлари Салоҳ ад-Дин йўлида ўта зарур озиқ-овқат захиралари учун навбатда турган минглаб одамларга ўт очган ва бир нечта снарядлар отган.
Нусейрат ҳудудида ҳаракатланаётган Исроил қўшинлари тунда маҳаллий аҳоли уларга потенциал хавф туғдирадиган тарзда яқинлашганидан сўнг огоҳлантирувчи ўқ узган, бироқ улар бирор ким жароҳат олганини билмаган.
Ғазо шимоли ва жанубида Исроилнинг 3 та ҳаво ҳужуми оқибатида яна 19 киши ҳалок бўлди, дея хабар бермоқда фуқаро мудофааси агентлиги. Улар орасида Ғазонинг Зайтун ҳудудидаги уйга зарба берилганда ҳалок бўлган 8 киши ҳам борлиги айтилган. Исроил бу ҳужумни “ҲАМАСнинг ҳарбий салоҳиятини йўқ қилишга урингани” билан изоҳламоқда.
Ғазонинг ҲАМАС томонидан бошқариладиган соғлиқни сақлаш вазирлиги 18 июнь куни сўнгги 24 соат ичида камида 140 киши ҳалок бўлганини билдирган. Вазирлик 17 июнь куни Хон Юнус шаҳрида 51 киши ёрдам кутиш чоғида ҳалок бўлганини маълум қилганди. БМТ эса қурбонлар сони 60 дан ошганига ишора қилган.
Соғлиқни сақлаш вазирлиги маълумотларига кўра, Исроил ва АҚШ томонидан қўллаб-қувватланадиган Ғазо гуманитар жамғармаси 26 май куни иш бошлаганидан бери бу ерда ёрдам олишга уринган деярли 400 киши ҳалок бўлган.
Изоҳ (0)