Эроннинг 15 июнга ўтар кечаси Исроилга ракета зарбалари оқибатида Тель Авив яқинида турар жой бинолари вайрон бўлди.
Баллистик ракета Тель Авив чеккасидаги асосан русийзабонлар яшаган Бат Ям шаҳарчасида кўп қаватли турар жой биносига келиб урилган. Тармоқларда уйга зарба берилиши ва зарбадан сўнг вайронага айлангани акс этган видеолар тарқалди.
The Times of Israel ёзишича, бу зарбалар оқибатида камида 6 киши ҳалок бўлди, 100 дан ортиқ киши яраланган, 3 киши бедарак йўқолган. Бат Ям мерига кўра, улар вайроналар остида бўлиши мумкин. Қутқарув хизмати маълумотларига кўра, ҳалок бўлганларнинг 2 нафари 8 ва 10 ёшдаги болалар бўлган.
Шаҳарчада 61 та бинога зарар етган, уларнинг 6 таси тўлиқ бузилиб ташланиши керак.
Исроил шимолидаги Тамра шаҳрига берилган зарба оқибатида эса расмийларга кўра, тўрт киши ҳалок бўлган. Тамра асосан араблар яшовчи шаҳар бўлиб, Ҳайфадан, тахминан, 20 километр узоқликда жойлашган. Ҳалок бўлганларнинг барчаси мусулмон бўлган араб аёлларидир.
Мамлакатнинг марказий қисмидаги Реховот шаҳрида Эрон зарбаси оқибатида 40 киши яраланди.
Тунги ҳужумларда жами 200 га яқин одам жароҳатланган.
Эрон-Исроил можароси
13 июнга ўтар кечаси Исроил Эрон ядро қуроли яратишга яқинлашгани сабабли ядровий, ҳарбий объектлар ва юқори мартабали ҳарбийлар жойлашган манзилларга ҳужум қилди. Зарбалар оқибатида Ислом инқилоби қўриқчилари корпусининг бир неча раҳбарлари ва эронлик физик-ядрошунослар ҳалок бўлди. Улар орасида Корпус қўмондони Ҳусайн Саламий, Эрон Қуролли кучлари бош штаби бошлиғи Муҳаммад Бақерий, ИИҚК “Хотам ал-Анбиё” бўлинмаси қўмондони Ғулом Али Рашид, шунингдек, олимлар Фаридун Аббосий Давоний ва Озод Муҳаммад Маҳдий Теҳрончий бор. Жами 78 киши ҳалок бўлди, 320 дан ортиқ киши жароҳат олди.
Эрон олий раҳбари Исроилнинг зарбаларини уруш эълони деб атади. “Урушни улар бошлашди. Биз уларнинг ўша ёвузлигидан кейин омон қолишига йўл қўймаймиз”, деди Али Хоманаий. Ўша куни кечқурун Ислом инқилоби қўриқчилари корпуси Исроилга қарши “Ҳақиқий ваъда-3” жавоб операцияси бошланганини эълон қилди. Эрон Исроилга уч марта ракета зарбалари берди.
Исроил Теҳрондан келаётган ядровий таҳдидга қарши туриш учун Эрон олий раҳнамоси Оятуллоҳ Али Хоманаийни ҳам ўлдириши мумкин.
Изоҳ (0)