АҚШ фуқароларининг ярмидан кўпи Вашингтоннинг Эрон ва Исроил ўртасидаги можарода иштирок этмаслиги кераклигини таъкидламоқда. Бу YouGov сўровномаси натижаларидан маълум бўлди.
Сўровнома 13-16 июнь кунлари ўтказилган. Унда 1,5 мингга яқин киши иштирок этган. Респондентларнинг 60 фоизи АҚШнинг ушбу можарога аралашишига қарши чиққан, 16 фоизи эса бунга ижобий қарашини билдирган. Қолган 24 фоиз ўз нуқтайи назарини аниқлай олмаганини маълум қилган.
Сўровда иштирок этганларнинг кўпчилиги (56 фоизи) АҚШ Эрон билан ядро дастури бўйича музокараларда қатнашиши лозим деб ҳисоблайди.
Тадқиқот натижаларига кўра, америкаликларнинг тахминан 50 фоизи Эронни “АҚШнинг душмани” сифатида баҳолайди.
Сўровнома шуни кўрсатдики, америкаликлар орасида 36 фоизи Исроилни АҚШнинг иттифоқчиси деб билади, 10 фоизи Исроилга дўстона муносабатда эмаслигини айтган, 6 фоизи эса уни душман деб атаган. Қолган иштирокчилар эса жавоб беришга қийналган.
Илгари баъзи Ғарб ОАВлари манбаларга таяниб, АҚШ президенти Дональд Трамп АҚШнинг Исроилнинг Эрон ядро объектларига зарба беришида иштирок этиш имкониятини кўриб чиқаётгани ҳақида хабар берган эди.
Бундан олдин Трамп Truth Social ижтимоий тармоғида Теҳрон ҳақида бир қатор кескин баёнотлар берган эди. Хусусан, у Эронга ядро қуролини қўлга киритишига йўл қўймаслигини айтиб, мамлакат ҳукуматидан “сўзсиз таслим бўлишни” талаб қилган.
Изоҳ (0)